Chwythu'r chwiban: Galw ar gyngor sir i ymddiheuro

Fe fydd cabinet y cyngor yn trafod yr argymhellion ddydd Llun

Fe ddylai Cyngor Sir Penfro ymddiheuro yn ddiamod i ddynes wnaeth golli ei swydd ar ôl chwythu'r chwiban am ddyn oedd yn cam-drin plant, medd adroddiad swyddogol.

Fe wnaeth Sue Thomas fynegi pryder am Michael 'Mik' Smith yn 2005, ond yna cafodd hithau ei diswyddo.

Cafodd Smith, cyn weithiwr ieuenctid o Hwlffordd, ei garcharu am chwe blynedd yn 2014 am droseddau rhyw yn erbyn plant.

Mae'r adroddiad yn argymell y dylai Ms Thomas dderbyn ymddiheuriad yn ogystal â thaliad ariannol gan y Cyngor.

Ond mae cyngor cyfreithiol hefyd wedi ei gynnwys sy'n dweud nad oes gan y cyngor y pwerau angenrheidiol i wneud taliadau o'r fath, ac i wrthod yr argymhelliad.

• Cyngor i gyhoeddi dogfen troseddwr rhyw

• Ymchwiliad i gyngor wedi trosedd ryw

Cafodd Michael John Smith ei gyflogi fel gweithiwr ieuenctid rhwng Mai 2001 ac Ionawr 2012

Bu bron i Smith gael ei gymeradwyo fel gofalwr maeth gan Gyngor Sir Penfro er i bryderon gael eu mynegi am ei ymddygiad tra yng nghwmni plant.

Cafodd Smith ei ddiswyddo gan y cyngor yn 2012 ac fe wnaeth y troseddau ddigwydd blwyddyn wedi iddo adael yr awdurdod.

Fe fydd Cabinet Cyngor Sir Penfro yn trafod argymhellion yr adroddiad, gafodd ei lunio gan Grŵp Gorchwyl a Gorffen y cyngor, ddydd Llun nesaf.