Elfyn Evans: Angen dysgu a symud ymlaen wedi siom Corsica

"Anghofio, a dysgu o beth sydd wedi mynd o'i le."

Dyna yw'r ffordd bydd y gyrrwr rali o Ddolgellau, Elfyn Evans, yn paratoi ar gyfer y ras nesaf ym Mhencampwriaeth Rali y Byd, ar ôl gorffen yn drydydd yn Rali Corsica ddiwedd Mawrth.

Roedd y Cymro wedi arwain y rali am saith o'r 14 o gymalau cyn iddo gael pyncjar gyda llai na 11km i fynd tan ddiwedd y ras.

Wrth edrych yn ôl, dywedodd Evans fod y ras wedi bod yn "siom fawr ar yr adeg".

"Ti'n gweithio mor galed a rhoi gymaint o waith mewn dros y penwythnos ac i golli o yn y ffordd yna mae o wrth gwrs yn brifo.

"Ond mae'n ddarn o'r sport a 'da ni wedi bod ar yr ochr arall o blaen i hynny, dwi'n cofio yn Finland yn 2017 cawsom ni'r safle o 0.3 eiliad.

"Mae'n gweithio'r ddwy ffordd."

Daeth Evans (ail o'r dde) yn drydydd yn Rali Corsica fis diwethaf ar ôl cael pyncjar hwyr

Ar hyn o bryd mae Evans, sy'n rasio i dîm M-Sport Ford WRT, yn y bedwaredd safle ym Mhencampwriaeth y Byd gyda 43 o bwyntiau.

Mae'r Cymro 32 o bwyntiau y tu ôl i'r arweinydd, Thierry Neuville o Wlad Belg, sy'n rasio ar ran Hyundai.

Nawr mae Evans yn cyfaddef fod angen "anghofio ac edrych ymlaen".

• Torcalon i Elfyn Evans yn Rali Corsica

• Elfyn Evans yn ennill Rali GB Cymru

Ar ddiwedd Ebrill bydd Evans a'i dîm yn teithio i'r Ariannin ar gyfer pumed ras yn y bencampwriaeth.

Gyda 10 ras yn weddill mae'n dal i obeithio y gall ddringo yn ôl i'r brif safle.

"'Da ni licio gobeithio a 'da ni'n 'neud bob dim fedrwn ni i wneud y gorau fedrwn ni.

"Cawsom ni ddim y cychwyn gorau i'r tymor yn Monte Carlo ar ôl damwain eithaf mawr. Ond yn gobeithio am ragor o ganlyniadau ar y podiwm."

Wrth edrych ymlaen, mae'n dweud y bydd y ras yn yr Ariannin yn her.

"Mae'n rali dwi'n mwynhau ond mae 'na sialens. Mae'n rough dros ben ac mae angen edrych ar ôl y car, mae'n hawdd iawn pigo difrod neu gael pyncjar tebyg."

Bydd rali Xion Argentina yn cael ei chynnal rhwng 25-28 Ebrill.