Ymgeiswyr Llafur yng Nghymru'n galw am refferendwm arall

Mae Pwyllgor Gwaith Llafur yn cwrdd ddydd Mawrth er mwyn llunio maniffesto'r blaid

Mae'r pedwar ymgeisydd Llafur yng Nghymru ar gyfer yr etholiadau Ewropeaidd wedi galw ar y blaid i roi addewid clir yn ei maniffesto yn galw am refferendwm arall.

Mewn llythyr dywedodd y pedwar bod y blaid "mewn perygl o golli cefnogaeth yn sylweddol" pe na bai'n cefnogi'r alwad am bleidlais arall.

Mae wedi cael ei anfon i'r Prif Weinidog Mark Drakeford a Mick Antoniw, sy'n cynrychioli Llafur Cymru ar Bwyllgor Gwaith y Blaid Lafur yn ganolog - yr NEC.

Mae'r llythyr hefyd wedi ei arwyddo gan aelodau seneddol Llafur, aelodau Cynulliad y blaid ac arweinwyr cynghorau sir.

'Pwyso a mesur'

Fe fydd yr NEC yn cwrdd ddydd Mawrth i benderfynu cynnwys y maniffesto ar gyfer yr ymgyrch etholiadol.

Mae Mr Drakeford wedi dweud wrth y BBC y dylai refferendwm, er mwyn cadarnhau neu wrthod unrhyw benderfyniadau ar Brexit, barhau yn rhan o'r drafodaeth wrth lunio'r maniffesto.

Pan ofynnwyd i Mr Drakeford a oedd ganddo unrhyw gyngor i Mr Antoniw cyn cyfarfod yr NEC ddydd Mawrth, dywedodd ei fod yn disgwyl i AC Pontypridd "ddefnyddio ei allu i bwyso a mesur".

Mae 38 o Lafurwyr - yn cynnwys gwleidyddion, aelodau a swyddogion undebau - wedi arwyddo'r llythyr yn galw ar Mr Drakeford a Mr Antoniw i ddweud yn blaen eu bod yn cefnogi "maniffesto sy'n cynnwys pleidlais ar unrhyw gytundeb mae'r Senedd yn ei gymeradwyo, gydag opsiwn hefyd o barhau yn rhan o'r Undeb Ewropeaidd".