Carcharu wyth aelod arall o gang cyffuriau o Gasnewydd

Gang cyffuriauHeddlu De Cymru

Cafodd 16 aelod o'r gang eu harestio 'nol ym mis Mehefin 2018

Mae wyth aelod o gang cyffuriau o Gasnewydd wedi cael eu dedfrydu i gyfanswm o dros 30 mlynedd yn y carchar.

Mae hanner arall y grŵp, wnaeth gyflenwi Casnewydd â gwerth hyd at £2.7m o gyffuriau, eisoes wedi cael eu carcharu ym mis Mawrth.

Cafodd y grŵp, oedd yn cael ei arwain gan y brodyr Jerome a Blaine Nunes, eu harestio ym mis Mehefin y llynedd yn dilyn ymdrech eang gan yr heddlu oedd yn cynnwys dros 120 o swyddogion.

Cafwyd yr wyth yn euog o gynllwynio i gyflenwi cyffur dosbarth A yn Llys y Goron Casnewydd ddydd Gwener.

Heddlu De Cymru

Cafodd Angela Collingbourne ei dal yn cyfri arian o werthiant cyffuriau ar gamerâu cylch cyfyng

Ymysg y rhai cafodd eu dedfrydu dydd Gwener oedd mam y brodyr Nunes, Angela Collingbourne.

Roedd Collingbourne yn helpu'r grŵp i werthu cyffuriau tra bod ei meibion yn rheoli'r ymgyrch o'r carchar.

Clywodd y llys bod y gang wedi dosbarthu tua 42kg o gocên yn y ddinas rhwng Gorffennaf 2016 a Mehefin 2018.

Dywedodd Iwan Jenkins o Wasanaeth Erlyn y Goron fod yr ymchwiliad "wedi dod o hyd i swm sylweddol o gyffuriau oedd yn cael ei werthu ar strydoedd Casnewydd" a bod "y grŵp yn drefnus iawn gyda phob unigolyn yn chwarae rôl benodol."

Dedfrydau

  • Angela Collingbourne - chwe blynedd;

  • Khaleen Hussain - chwe blynedd;

  • Tia Donovan-Jones - dwy flynedd;

  • Matthew Croft - saith blynedd a phedwar mis;

  • Thomas Jones - pedair blynedd;

  • Rhys Jones - pedair blynedd;

  • Liam Slade - un blwyddyn;

  • Joshua Southall - wyth mis.

Straeon perthnasol