Fferm Trecadwgan: Cyngor ddim am ailfeddwl

Mae ymgyrchwyr am gael mwy o amser er mwyn i bobl leol godi arian

Mae aelod o gabinet Cyngor Sir Penfro wedi dweud nad oes bwriad gan yr awdurdod i atal y broses o werthu un o ffermydd cyngor yn Solfach, er gwaetha ymgyrch gan bobl leol sydd am ei phrynu.

Dywedodd y Cynghorydd Bob Kilmister wrth gyfarfod cyhoeddus yn Solfach y bydd yr arwerthiant ar gyfer fferm Trecadwgan yn parhau, oni bai bod yna gynnig rhesymol yn cael ei wneud gan yr ymgyrchwyr, a'u bod nhw'n llwyddo hefyd i godi'r ernes o £50,000 cyn yr arwerthiant yng nghanol mis Gorffennaf.

Fe alwodd un o'r ymgyrchwyr, Rupert Dunn, ar y cyngor i roi mwy o amser i bobl leol i godi'r arian gan ddweud eu bod am ddatblygu menter gymunedol.

Yn ôl ymgyrchwyr mae dros 1,000 o bobl wedi arwyddo deiseb yn gwrthwynebu gwerthu'r safle.

Bu Fferm Trecadwgan yn wag ers mis Mawrth eleni, ac mae disgwyl iddi gael ei gwerthu mewn ocsiwn ar 17 Gorffennaf.

• Galw am achub fferm i'r gymuned

Bwriad y cyngor yw gwerthu'r fferm mewn arwerthiant ym mis Gorffennaf

Mae'r ffermdy yn dyddio 'nôl i'r 15fed ganrif, ac mae'r cyngor am ei werthu gydag 11 erw o dir ac 13 o adeiladau allanol.

Mae yna fwriad i lansio ymgyrch cyllido torfol yn ystod y dyddiau nesaf, ynghyd a chynllun cyfranddaliadau er mwyn codi'r swm angenrheidiol.

Fe ddywedodd Mr Dunn wrth y cyfarfod, taw'r peth "graslon" i wneud fyddai tynnu fferm Trecadwgan oddi ar y farchnad.

Yn ôl y Cynghorydd Kilmister, roedd y cyngor dan "straen ariannol enfawr" a doedd hi ddim yn bosib i wneud hynny.

Er taw £450,000 yw'r amcan bris ar gyfer Trecadwgan, fe glywodd y cyfarfod cyhoeddus bod disgwyl i'r pris gwerthu terfynol fod dipyn uwch.