Tocynnau Eisteddfod am ddim wedi mynd o fewn diwrnod

Eisteddfod Caerdydd

Mae'r Eisteddfod yn dweud bod miloedd wedi ymweld â'r Ŵyl am y tro cyntaf llynedd yng Nghaerdydd

Mae'r Eisteddfod Genedlaethol wedi cyhoeddi bod pob un o'r 6,000 o docynnau gafodd eu cynnig am ddim i bobl Sir Conwy bellach wedi mynd.

Roedd y tocynnau ar gael ar gyfer dydd Sul agoriadol y Brifwyl yn Llanrwst eleni, gyda'r bwriad o ddenu pobl leol sydd heb fod i'r Eisteddfod o'r blaen.

Cafwyd cyllid o £50,000 gan Lywodraeth Cymru er mwyn cynnal y cynllun, gyda'r gobaith o efelychu Eisteddfod 2018 yng Nghaerdydd pan ymwelodd miloedd â hi am y tro cyntaf.

Wrth gyhoeddi'r arian, dywedodd Gweinidog y Gymraeg yn Llywodraeth Cymru, Eluned Morgan: "Dyma gyfle gwych i bobl Sir Conwy ymuno yn y digwyddiad cyffrous hwn sy'n dathlu Cymru."

Ychwanegodd Ms Morgan: "Mae gan Llywodraeth Cymru gynllun uchelgeisiol i gynyddu nifer y siaradwyr Cymraeg i filiwn erbyn 2050.

"Er mwyn cyrraedd y nod, rhaid inni greu cyfleoedd i bobl glywed yr iaith a'i defnyddio yn eu bywydau bob dydd ac mewn pob math o leoliadau cymdeithasol.

"Bydd yr arian 'dw i'n ei gyhoeddi heddiw yn golygu y bydd teuluoedd lleol yn gallu mynd i ddydd Sul agoriadol yr ŵyl am ddim.

"Dw i'n gobeithio y bydd hyn yn gyfle iddyn nhw fwynhau diwylliant Cymru, ac efallai mewn rhai achosion newid eu syniadau o beth ydy'r Eisteddfod - sef cyfle i ddathlu Cymru, ei phobl, a'i thraddodiadau diwylliannol."

Nid yw’r post yma ar X yn gallu ymddangos yn y porwr. Os gwelwch yn dda defnyddiwch Javascript neu geisio eto ar borwr gwahanol.Gweld y cynnwys gwreiddiol ar X.
Nid yw'r BBC yn gyfrifol am gynnwys safleoedd allanol
I osgoi neges X gan Eisteddfod

Caniatáu cynnwys X?

Mae’r erthygl yma’n cynnwys elfennau sydd wedi eu darparu gan X. Gofynnwn am eich caniatâd cyn eu llwytho, oherwydd fe allai wneud defnydd o cwcis a thechnolegau eraill. Efallai y byddwch am ddarllen polisi cwcis X a pholisi preifatrwydd cyn derbyn. I weld y cynnwys yma dewiswch ‘derbyn a pharhau’.

Nid yw'r BBC yn gyfrifol am gynnwys safleoedd allanol

Dywedodd Prif Weithredwr yr Eisteddfod Genedlaethol, Betsan Moses: "Mae'r Eisteddfod yn ddigwyddiad cynhwysol sy'n cynnig cyfle ffantastig i bobl o bob cefndir gael profiad o'r Gymraeg ar waith.

"Felly rydyn ni'n awyddus i fachu ar bob cyfle i gyflwyno'r digwyddiad, a'r profiadau y mae'n eu cynnig, i bobl newydd.

"Rydyn ni'n ddiolchgar iawn i'r Gweinidog am y gefnogaeth y mae'n ei rhoi i'r Eisteddfod, ac yn enwedig y tro hwn am y gefnogaeth i'n hymdrechion i agor y drysau a chroesawu hyd yn oed mwy o bobl i deulu mawr yr Eisteddfod Genedlaethol.

"Byddwn ni'n trafod ffyrdd addas o ddosbarthu'r tocynnau gyda phartneriaid perthnasol. Ein nod yw sicrhau bod cynnal yr Eisteddfod Genedlaethol yn Sir Conwy yn gyfle i deuluoedd ddod yn fwy cyfarwydd â'r Gymraeg a'r diwylliant sy'n gysylltiedig â hi."

Eisteddfod Llanrwst 1989

Y tro diwethaf i'r Eisteddfod Genedlaethol fod yn Llanrwst oedd yn 1989

Straeon perthnasol