Alun Wyn Jones i osod record capiau yn erbyn Lloegr

Bydd Alun Wyn Jones yn chwarae yn ei 135ain gêm ryngwladol ddydd Sul

Bydd Alun Wyn Jones yn hawlio ei le fel y chwaraewr o Gymru sydd â'r nifer fwyaf o gapiau rhyngwladol wrth iddo arwain y tîm yn erbyn Lloegr yn Twickenham ddydd Sul.

Fe fydd y clo 33 oed yn chwarae yn ei 135ain gêm ryngwladol - 126 i Gymru a naw i'r Llewod.

Dim ond y prop, Gethin Jenkins sydd â mwy o gapiau dros Gymru - 129 - sydd hefyd â pum cap dros y Llewod.

Bydd y gêm, sy'n rhan o'r paratoadau ar gyfer Cwpan Rygbi'r Byd yn Japan, yn dechrau yn Twickenham am 14:00 ddydd Sul.

Fel rhan o'u paratoadau bydd Cymru'n herio Lloegr ac Iwerddon ddwywaith yr un, cyn iddyn nhw chwarae eu gêm agoriadol yng Nghwpan y Byd yn erbyn Georgia ar 23 Medi.

Awstralia, Fiji ac Uruguay yw'r timau eraill yn y grŵp.

Bydd Warren Gatland yn gadael fel rheolwr Cymru wedi Cwpan Rygbi'r Byd

Bydd Jones yn arwain tîm cyfarwydd ddydd Sul, gyda Warren Gatland yn dewis tîm profiadol i herio'r hen elyn.

Gareth Anscombe sy'n dechrau fel maswr, gyda Gareth Davies yn fewnwr a Dan Biggar ar y fainc.

Yn dilyn y newyddion y bydd Taulupe Faletau yn colli Cwpan y Byd gydag anaf, Ross Moriarty fydd yn parhau fel wythwr, gyda Justin Tipuric ac Aaron Wainwright yn flaenasgellwyr.

Nicky Smith, Ken Owens a Tomas Francis fydd yn y rheng flaen, gydag Adam Beard yn bartner i Jones yn yr ail reng.

Tîm Cymru

Liam Williams; George North, Jonathan Davies, Hadleigh Parkes, Josh Adams; Gareth Anscombe, Gareth Davies; Nicky Smith, Ken Owens, Tomas Francis, Adam Beard, Alun Wyn Jones (C), Aaron Wainwright, Justin Tipuric, Ross Moriarty.

Eilyddion: Elliot Dee, Wyn Jones, Dillon Lewis, Jake Ball, Aaron Shingler, Tomos Williams, Dan Biggar, Owen Watkin.