Y Gynghrair Genedlaethol: Solihull Moors 3-1 Wrecsam

Mae Brian Flynn wedi colli un ac ennill un o'i ddwy gêm wrth y llyw y tro yma

Fe gollodd Wrecsam o 3-1 yn erbyn Solihull Moors yn y Gynghrair Genedlaethol nos Fawrth.

Sgoriodd Jamey Osborne ddwywaith i'r tîm cartref, naill ochr i gôl gan Jamie Reckford.

Bobby Grant rwydodd i'r Dreigiau, ond dim ond gôl gysur oedd hi yn y diwedd.

Roedd amheuaeth y byddai'r gêm yn cael ei chwarae oherwydd y tywydd garw, ac mi fyddai Wrecsam wedi bod yn falch o ohiriad o wybod y canlyniad.

Mae'r canlyniad yn golygu bod Wrecsam yn aros tu allan i safleoedd y cwymp ar wahaniaeth goliau'n unig.

Hon oedd ail gêm Brian Flynn fel rheolwr dros dro yn dilyn penderfyniad y clwb i ddiswyddo Bryan Hughes fel rheolwr yr wythnos diwethaf.

Fe lwyddodd Wrecsam i drechu Ebbsfleet 1-0 ddydd Sadwrn.