BAFTA Cymru 2019: Gwobrwyo goreuon byd ffilm a theledu

Mewn digwyddiad llawn rhwysg yn Neuadd Dewi Sant, Caerdydd cafodd goreuon y byd ffilm a theledu eu gwobrwyo yn seremoni BAFTA Cymru 2019.

Eleni ffilm ddogfen sy'n dathlu amrywiaeth cerddoriaeth Gymraeg oedd yn arwain yr enwebiadau.

Cafodd Anorac chwech o enwebiadau a Huw Stephens, cyflwynydd y rhaglen a'r seremoni wobrwyo yng Nghaerdydd nos Sul, a enillodd y wobr i'r cyflwynydd gorau.

Enillodd y ffilm hon hefyd wobr am ffotograffiaeth, golygu a sain.

Yn Anorac mae Huw Stephens yn mynd ar daith ar draws Cymru gan daflu goleuni ar gantorion a grwpiau dylanwadol

Yr actor o Fôn, Celyn Jones yn rhan y llofrudd Levi Bellfield yn nrama ITV, Manhunt a enillodd y wobr am yr actor gorau.

Roedd nifer o actorion amlwg wedi cyrraedd y rhestrau byrion gan gynnwys Syr Anthony Hopkins, Jodie Whittaker a Michael Sheen.

Syr Anthony Hopkins yn rhan King Lear gyda'r actores Florence Pugh

Enillwyd y wobr am yr actores orau gan Gabrielle Creevey o'r ddrama gomedi In My Skin - comedi sydd wedi ei leoli yng Nghaerdydd.

Hwn oedd y pumed tro i Eiry Thomas gael ei henwebu yn y categori ar gyfer yr actores orau

Fe gafodd, Steffan Cennydd un o sêr Enid a Lucy enwebiad am y wobr Torri Trwodd ynghyd â Seren Jones am y rhaglen ddogfen Zimbabwe, Taid a Fi a fu'n olrhain ei thaith gyntaf erioed i famwlad ei mam ond enillydd y wobr nos Sul oedd Jamie Jones am ei ran yn Obey.

Roedd Fflur Dafydd ar restr fer y wobr ar gyfer awduron am y gyfres 35 Awr, gan ymuno ag Andrew Davies am Les Miserables, Owen Sheers am The NHS: To Provide All People, a Russell T Davies am A Very English Scandal- enillwyd y categori gan Russell T Davies.

Ymysg y rhaglenni Cymraeg eraill a gafodd eu henwebu roedd Cynefin a Drych: Chdi, Fi Ac IVF a chynyrchiadau ar gyfer S4C oedd yr holl enwebiadau yn y categori rhaglen adloniant sef Cân i Gymru: Dathlu 50, Elis James - Cic Lan Yr Archif, Priodas Pum Mil! a Geraint Thomas: Viva Le Tour- yr enillydd nos Sul oedd Priodas Pum Mil!

Roedd enwau enillwyr dwy o wobrau arbennig Bafta Cymru 2019 eisoes wedi eu cyhoeddi.

Ddechrau mis Hydref cyhoeddwyd mai Bethan Jones fydd yn derbyn Gwobr Siân Phillips am gyfraniad i deledu a ffilm ryngwladol, tra bod Lynwen Brennan yn cael ei anrhydeddu am gyfraniad rhagorol i'r diwydiant.

Cafodd gwobr Siân Phillips ei chyflwyno gan yr actor Iwan Rheon

Lynwen Brennan yn derbyn ei gwobr arbennig nos Sul

Yn ôl cyfarwyddwr BAFTA Cymru, Hannah Raybould mae hi wedi bod yn "flwyddyn wych i gynhyrchu ffilm, teledu a gemau yng Nghymru" gan "arwain at fwy o geisiadau - y nifer fwyaf a gofnodwyd erioed - ar draws ein holl gategorïau crefft, perfformio a chynhyrchu".

Yr enillwyr:

GWOBR SIÂN PHILLIPS - BETHAN JONES

CYFRANIAD EITHRIADOL I DELEDU - LYNWEN BRENNAN

RHAGLEN ADLONIANT-PRIODAS PUM MIL

DRAMA DELEDU-IN MY SKIN

NEWYDDION A MATERION CYFOES-THE UNIVERSAL CREDIT CRISIS

FFOTOGRAFFIAETH: FFEITHIOL- JONI CRAY AND GRUFFYDD DAVIES ar gyfer Anorac

RHAGLEN DDOGFEN SENGL- CRITICAL: INSIDE INTENSIVE CARE

FFILM FER- GIRL

GWOBR TORRI TRWODD- JAMIE JONES ar gyfer Obey

GOLYGU-MADOC ROBERTS ar gyfer Anorac

CYFARWYDDWR: FFEITHIOL- MEI WILLIAMS ar gyfer The Incurable Optimist

CYFRES FFEITHIOL- VELINDRE - HOSPITAL OF HOPE

SAIN- JULES DAVIES ar gyfer Anorac

CYFLWYNYDD - HUW STEPHENS ar gyfer Anorac

GÊM - TIME CARNAGE VR

COLUR A GWALLT-Claire Williams ar gyfer Apostle

DYLUNIO CYNHYRCHU- CATRIN MEREDYDD ar gyfer Black Mirror: Bandersnatch

FFOTOGRAFFIAETH A GOLEUO: FFUGLEN - ADAM ETHERINGTON ar gyfer Gwen

CYFARWYDDWR: FFUGLEN-MARC EVANS ar gyfer Manhunt

FFILM NODWEDD/DELEDU-LAST SUMMER

AWDUR- RUSSELL T DAVIES ar gyfer A Very English Scandal

EFFEITHIAU ARBENNIG A GWELEDOL- BAIT STUDIO ar gyfer Apostle

RHAGLEN BLANT- GOING FOR GOLD

DYLUNIO GWISGOEDD-DINAH COLLIN ar gyfer Gwen

ACTORES- GABRIELLE CREEVEY fel Bethan Gwyndaf yn In My Skin

ACTOR- CELYN JONES fel Levi Bellfield yn Manhunt