Dyn yn ddieuog o ddynladdiad yn dilyn ffrae yn Wrecsam

Bu farw Philip James Long ar ôl cael ei daro yn ystod noson allan gyda'i wraig, Hayley

Mae rheithgor wedi cael dyn ifanc o sir Wrecsam yn ddieuog o ddynladdiad tad i bedwar o blant oedd wedi ceisio atal sgarmes rhwng criw o bobl ifanc yn ystod noson allan gyda'i wraig.

Roedd Matthew Curtis, sy'n 18 oed ac o Wersyllt, yn gwadu dynladdiad Philip James Long ym mis Awst y llynedd.

Bu farw'r gŵr 36 oed o Marchwiel o ganlyniad i syrthio'n ôl a tharo'i ben ar y ddaear ar ôl cael ei ddyrnu unwaith yn ystod y digwyddiad yng nghanol Wrecsam.

Dywedodd Mr Curtis ei fod wedi taro Mr Long gan ofni ei fod ar fin ymosod ar un o'i ffrindiau, ond doedd dim bwriad i'w anafu.

• Dynladdiad: Teyrnged teulu wrth i ddyn fynd o flaen llys

Clywodd Llys Y Goron Yr Wyddgrug bod Mr Long wedi trefnu'r noson allan fel syrpréis i'w wraig, Hayley, i ddathlu eu hail ben-blwydd priodas.

Roedden nhw'n ceisio cael tacsi yn Ffordd y Coleg yn oriau mân ddydd Sul, 4 Awst ac wedi mynd heibio criw o bobl ifanc pan welson nhw sgarmes ble roedd dynes yn taro dyn.

'Rhesymol a chymesur'

Dywedodd Mr Curtis wrth y rheithgor bod Mr Long wedi mynd atyn nhw i geisio helpu, ond ei fod ar un pwynt "wedi ei cholli hi", gan wthio un o'i ffrindiau i'r llawr.

Oherwydd hynny, meddai, fe darodd e yn ei wyneb unwaith gyda'i ddwrn chwith, gan ofni fod Mr Long yn mynd i ymosod arno eto.

Mynnodd bod yr hyn a wnaeth yn "rhesymol" ac "yn gymesur".

Bu farw Mr Long o anafiadau "catastroffig" yn Ysbyty Brenhinol Prifysgol Stoke ar 6 Awst, er gwaethaf ymdrechion i achub ei fywyd.

Fe wnaeth archwiliad post-mortem ddangos anaf sylweddol i'w benglog, gwaedlif yn yr ymennydd a thystiolaeth o ddwrn nerthol i'w lygaid chwith.

Roedd Mr Curtis dan deimlad pan gyhoeddodd y rheithgor eu dyfarniad wedi llai na thair awr o ystyried y dystiolaeth.

Dywedodd y Barnwr Rhys Rowlands fod teulu Mr Long wedi ymddwyn yn urddasol ac yn faddeugar yn ystod yr achos, gan ychwanegu ei gydymdeimladau atyn nhw.