Achub menyw oedd yn cydio mewn cangen o afon yn Aberhonddu

Roedd y fenyw wedi llwyddo i gydio mewn cangen coeden cyn cael ei hachub

Mae menyw yn cael triniaeth yn yr ysbyty ar ôl cael ei hachub o afon yn Aberhonddu yn yr oriau mân.

Cafodd y gwasanaethau brys eu galw i ardal promenâd y dref am 03:00 fore Iau.

Roedd y fenyw ei hun wedi llwyddo i gydio mewn cangen coeden.

Mae Aberhonddu yn ardal rhybudd melyn y Swyddfa Dywydd am law trwm, sydd mewn grym tan 14:00 ddydd Iau.

Roedd tua 20 o swyddogion Gwasanaeth Tân ac Achub Canolbarth a Gorllewin Cymru yn rhan o'r ymateb, gan gynnwys criwiau o'r Gelli Gandryll, Aberhonddu a Thalgarth.

Cafodd griw o Lyn Ebwy hefyd eu danfon i'r safle ond roedd y fenyw wedi ei thynnu o'r afon cyn iddyn nhw gyrraedd.

Cadarnhaodd Gwasanaeth Ambiwlans Cymru bod y fenyw wedi cael ei chludo i'r ysbyty.