Dau glaf arall wedi marw ar ôl cael coronafeirws

Mae nifer yr achosion positif o coronafeirws wedi cyrraedd 280 yng Nghymru

Mae dau berson arall, oedd wedi profi yn bositif i Covid-19, wedi marw yng Nghymru.

Mae bellach pump o bobl wedi marw yma, gyda chyfanswm o 233 yn y DU.

Dywedodd prif swyddog Meddygol Cymru, Dr Frank Atherton fod gan y cleifion gyflyrau iechyd eraill.

• Coronafeirws: Talu myfyrwyr meddygol i gynorthwyo

"Roedd un o'r cleifion yn 75 oed ac yn cael triniaeth yn Ysbyty Singleton a'r llall yn 98 oed ac yn cael triniaeth yn Ysbyty Glan Clwyd.

"Roedd gan y ddau gyflyrau iechyd eraill. Mae'n cydymdeimlad yn fawr gyda'u teuluoedd."

Yn gynharach ddydd Sadwrn cyhoeddodd Iechyd Cyhoeddus Cymru fod nifer yr achosion positif o coronafeirws yng Nghymru wedi cyrraedd 280.

Roedd hynny'n gynnydd o 89.

Yn ôl Dr Chris Williams, cyfarwyddwr achosion coronofeirws gyda Iechyd Cyhoeddus Cymru, mae nifer yr achosion go iawn yn debygol o fod yn llawer uwch, gyda choronafeirws yn bresennol ym mhob rhan o Gymru.

Dywedodd Dr Williams y bydd pobl sy'n gweithio wyneb yn wyneb â chleifion yn cael eu profi.

"Wrth i fwy o bobl gael eu profi bydd canllawiau pellach ar bwy sy'n gymwys i gael prawf.

"Mae'n bwysig bod y cyhoedd yn dilyn ein cynghorion."