'Ergyd aruthrol' colli parafeddyg â coronafeirws

Cafodd Gerallt Davies ei anrhydeddu â MBE am ei wasanaeth i'r maes cymorth cyntaf

Mae Gwasanaeth Ambiwlans Cymru wedi rhoi teyrnged i barafeddyg sydd wedi marw gyda coronafeirws.

Gerallt Davies yw'r aelod cyntaf o'r gwasanaeth i farw ar ôl cael Covid-19.

Roedd yn barafeddyg yng ngorsaf Cwmbwrla yn Abertawe.

"Mae ei farwolaeth yn ergyd aruthrol i ni oll," meddai prif weithredwr Gwasanaeth Ambiwlans Cymru, Jason Killens.

"Roedd Gerallt, a ymunodd â'r gwasanaeth yn 1994, nid yn unig yn aelod gwerthfawr o'n tîm ni ond yn aelod o Ambiwlans San Ioan hefyd, ble roedd yn Swyddog Gweithredoedd Cenedlaethol."

• YN FYW: Y newyddion diweddaraf am yr haint ar 20 Ebrill

• CANLLAW: Beth ddyliwn i ei wneud?

• AMSERLEN: Effaith haint coronafeirws yng Nghymru

• IECHYD MEDDWL: Tips gan Dr Ioan Rees

• DYSGU: Sut i gadw'r plant yn brysur gartref

Ychwanegodd ysgrifennydd ranbarthol Unite Cymru, Peter Hughes fod Mr Davies yn "unigolyn poblogaidd iawn".

"Bydd colled fawr ar ei ôl gan ei gyd-aelodau Unite, cydweithwyr a phawb oedd yn ddigon ffodus i'w 'nabod," meddai.

"Roedd Gerallt yn arwr ochr yn ochr â holl staff rheng flaen y gwasanaeth iechyd."

Anrhydedd

Oherwydd ei waith gydag Ambiwlans San Ioan fe gafodd Mr Davies MBE yn anrhydeddau'r Frenhines y llynedd am ei wasanaeth i ddarpariaeth cymorth cyntaf yng Nghymru.

Yn 2014, mewn partneriaeth â Chomisiynydd Heddlu a Throsedd De Cymru, fe helpodd i sefydlu cynllun Man Cymorth Abertawe, sydd wedi darparu gofal i filoedd o bobl mewn angen yng nghanol y ddinas.

Aeth ymlaen i reoli'r gwasanaeth, sy'n helpu lleihau'r angen am driniaeth ysbyty ac sy'n cael ei ystyried yn un o'r goreuon ar draws y DU.

Ychwanegodd Mr Killens: "Rydym yn canolbwyntio nawr ar gefnogi teulu a chydweithwyr Gerallt yn eu galar ar yr adeg anodd hwn."