Cofio un o athrawon ysgol trychineb Aberfan

Fe wnaeth Rennie Williams achub plant a oedd wedi'u caethiwo yn neuadd ysgol Pant-glas

Mae athrawes a fu'n gyfrifol am achub rhai o ddisgyblion Ysgol Pant-glas, ddiwedd Hydref 1966, wedi marw yn 86 oed.

Roedd Rennie Williams o Ferthyr wedi cael ei chanmol am ei dewrder rhyfeddol yn Aberfan ar 21 Hydref 1966.

Roedd hi newydd gofrestru ei dosbarth pan glywodd dwrw anferth. Fe wnaeth y trychineb ladd 144 o bobl, gan gynnwys 116 o blant.

Fe wnaeth Ms Williams achub nifer o'r plant oedd wedi'u caethiwo yn neuadd yr ysgol.

Bu farw ddydd Mercher wedi iddi fod yn cael triniaeth ar gyfer canser y gwaed.

Roedd Ms Williams o Benydarren, yn un o bedwar athro oedd wedi goroesi'r trychineb - hi, Mair Morgan, Hettie Williams a Howell Williams.

Fe barhaodd Ms Williams i ddysgu tan ei hymddeoliad.

Roedd Jeff Edwards yn wyth oed pan gafodd ei achub o'r rwbel.

'Menyw hyfryd'

Wrth gael ei holi gan y BBC dywedodd Mr Edwards fod Ms Williams yn "fenyw hyfryd - llawn gofal a theimlad".

"Fe achubodd hi nifer o blant ac fe arhosodd mewn cysylltiad â nhw."

Dywedodd Mr Edwards ei fod yn drist gwybod mai ond nifer fechan o bobl fyddai'n gallu mynd i'r angladd oherwydd cyfyngiadau coronafeirws.

Rennie Williams, a welir yr ail o'r dde, gyda Hettie Taylor aka Hettie Williams, Howell Williams a Mair Morgan

"Rwy'n drist," ychwanegodd Mr Edwards, "rwy'n siŵr y byddai cannoedd am fynd i'r angladd. Rwy'n gobeithio y bydd gwasanaeth coffa rhywdro eto iddi."

Wedi cyngerdd coffa i nodi 50 mlynedd ers y trychineb, dywedodd Ms Williams bod y perfformiad wedi ei chyffwrdd yn fawr.

Mae Ms Williams yn gadael mab Paul, wyrion a gorwyrion.