Ysgrifennydd Cymru yn trydar gwybodaeth 'anghywir'

Fe wnaeth Simon Hart ei sylw ar ôl bod mewn cyfarfod gyda Chomisiynwyr Heddlu a phedwar Prif Gwnstabl Cymru

Mae Prif Gwnstabl wedi dweud fod Ysgrifennydd Gwladol Cymru, Simon Hart, yn anghywir i ddweud fod gan bobl hawl i deithio hyd at 15 milltir i wneud ymarfer corff.

Roedd Mr Hart wedi gwneud y sylw ar Twitter ar ôl bod mewn cyfarfod gyda Chomisiynwyr Heddlu a phedwar Prif Gwnstabl Cymru.

Yn dilyn y cyfarfod dywedodd ar ei gyfrif Twitter, fod "consensws" y gallai pobl deithio 10-15 milltir i "bysgota, chwarae golff, syrffio neu wneud ymarfer corff" - gan gadw at y rheolau ymbellhau cymdeithasol.

Ond dywedodd Prif Gwnstabl Heddlu Dyfed-Powys, Mark Collins, wrth y BBC ei fod wedi trafod gyda Mr Hart ynglŷn â sut y gallai pobl sy'n byw mewn ardaloedd gwledig deithio.

"Roeddwn i'n siarad yn benodol am ardal Dyfed-Powys," meddai.

"Dywedais y byddai'n gwneud synnwyr i gael ardal 10 milltir o amgylch eich cartref."

Dywedodd Mark Collins na ddylai pobl yrru i ymarfer corff yng Nghymru

Mewn ymateb i sylw Mr Hart y gallai pobl deithio 10-15 milltir i ymarfer corff, dywedodd Mr Collins: "Nid yw'n gywir... ni ddylid gyrru er mwyn gwneud ymarfer corff."

Mae canllawiau Llywodraeth Cymru yn dweud y dylai ymarfer corff gael ei wneud yn lleol - mor agos â phosib at y cartref - ac yn gyffredinol, na ddylid gyrru i leoliad i ffwrdd o'r cartref i wneud hynny.

Roedd Comisiynydd Heddlu Gwent, Jeff Cuthbert hefyd yn y cyfarfod, a dywedodd mai sylw am sefyllfa arbennig yn Nyfed-Powys oedd y sgwrs yr oedd Mr Hart yn cyfeirio ati.

"Yn bendant, doedd o ddim yn safbwynt ynglŷn â theithio yng Nghymru yn gyffredinol. Ein cyngor ni yw aros yn lleol," meddai.

• CANLLAW: Beth yw'r newidiadau i'r cyfyngiadau?

• AMSERLEN: Llinell amser coronafeirws yng Nghymru

• IECHYD MEDDWL: Claf cyntaf Cymru'n annog positifrwydd

• DYSGU: Beth yw'r problemau wrth ailagor ysgolion?

Mae disgwyl adolygiad o'r canllawiau ddydd Mawrth.

Yn ystod cynhadledd i'r wasg ddydd Gwener dywedodd y Prif Weinidog, Mark Drakeford eu bod yn parhau'n ofalus, a ddim am ruthro i wneud penderfyniadau a allai achosi cynnydd arall mewn achosion o'r haint.

Dywedodd ei fod yn gobeithio y byddai ganddo fwy o fanylion yr wythnos nesaf, ond pwysleisiodd mai dim ond pan oedd hi'n ddiogel i wneud hynny y byddai'r cyfyngiadau'n cael eu codi.