Darllediad radio cyntaf o bencadlys newydd BBC Cymru

Daniel Glyn oedd y llais cyntaf i'w glywed o'r stiwdio newydd

Cafodd y rhaglen radio gyntaf ei darlledu o bencadlys newydd BBC Cymru fore Sadwrn.

Fe aeth BBC Radio Cymru 2 ar yr awyr yn fyw o'r Sgwâr Canolog yng Nghaerdydd am 07:00.

Ac am 11:00 fe ddarlledodd BBC Radio Cymru ei rhaglen gyntaf o'r adeilad newydd.

Roedd Radio Cymru cyn heddiw wedi bod yn darlledu o safle'r BBC yn Llandaf ers ei dyfodiad yn 1977.

• Lluniau: Radio Cymru yn 40

• Golygydd newydd am ddatblygu Radio Cymru 2

• 'Cartref creadigol' newydd i BBC Cymru

Llais y cyflwynydd Daniel Glyn oedd y cyntaf i'w glywed o'r stiwdio newydd ar Radio Cymru 2.

Roedd yn cael cwmni dau arall sef cyflwynydd Radio Cymru 2 a BBC Radio 1, Huw Stephens, a Caryl Parry Jones.

Ar Radio Cymru, Y Sioe Sadwrn oedd y rhaglen gyntaf i fynd ar yr awyr o'r adeilad newydd, gyda Shelley Rees a Rhydian Bowen Phillips yn cyflwyno.

'Newidiadau mawr'

Dywedodd Rhuanedd Richards, golygydd Radio Cymru, ei bod yn "falch iawn fod ein gwasanaethau Cymraeg bellach yn medru manteisio ar y dechnoleg ddarlledu orau wrth i ni barhau i weithio tuag at gyrraedd cynulleidfaoedd newydd".

"Cryfder mawr Radio Cymru a Radio Cymru 2 wrth gwrs yw ein bod ni'n darlledu o ganolfannau ar draws Cymru gyfan, ac mae ein hymrwymiad i hynny yn parhau."

Hywel Gwynfryn oedd cyflwynydd rhaglen gyntaf Radio Cymru, Helo Bobol! yn 1977

Roedd un o gyflwynwyr cyntaf erioed Radio Cymru yn 1977, Hywel Gwynfryn hefyd yn y Sgwâr Canolog ar gyfer y sioe fyw gyntaf o'r Sgwâr Canolog.

Bydd yn cyflwyno ei sioe o'r stiwdio newydd ddydd Sul.

"Ers i ddrysau Llandaf agor ym 1967, fe fu newidiadau mawr, chwyldro technolegol yn wir, ac mae'r adeilad newydd yn y Sgwâr Canolog yn brawf o hynny," meddai.

"Ond mae'r nod yn parhau yn ddigyfnewid - ceisio diddori'n cynulleidfa yn y modd mwyaf creadigol.

"Fe ddylai hynny, fel y sgwâr, fod yn ganolog i'n bwriad."

Bydd BBC Radio Wales yn dechrau darlledu o'r Sgwâr Canolog yn fuan.