Pum marwolaeth coronafeirws newydd - pob un yn Wrecsam

Mae pum person arall wedi marw gyda coronafeirws yng Nghymru, a'r cyfan yn ardal Wrecsam, meddai Iechyd Cyhoeddus Cymru ddydd Mercher.

Mae'n dod â chyfanswm y bobl sydd wedi marw gyda'r feirws yma i 1,554, yn ôl ffigyrau diweddara'r corff.

Cafodd 32 o achosion newydd eu cadarnhau, sy'n golygu bod 17,223 o bobl bellach wedi profi'n bositif am Covid-19 yng Nghymru.

Roedd bron i hanner yr achosion newydd -15 - yn Sir Wrecsam, a phump yn Sir Y Fflint.

Canolfan brofi symudol Covid-19 ym Mharc Caia, Wrecsam ddydd Mercher

Ddydd Mercher fe wnaeth aelodau'r cyhoedd ddechrau ymweld â dwy ganolfan brofi symudol sydd newydd eu sefydlu yn Wrecsam, heb orfod gwneud apwyntiad o flaen llaw.

Fe aeth tua 100 o gleifion i'r clinigau yn Hightown a Pharc Caia fore Mercher, yn dilyn cynnydd yn nifer achosion coronafeirws yn y dref.

Cadarnhaodd rheolwyr Bwrdd Iechyd Prifysgol Betsi Cadwaladr ddydd Mawrth fod rhwng 70 ac 80 o achosion positif o'r feirws wedi'u cofnodi yn Ysbyty Maelor Wrecsam.

Rhybuddiodd Llywodraeth Cymru y gallai gamu i'r adwy "os daw hi i'r pen" i orfodi mesurau ychwanegol i leihau nifer yr achosion.

'Gwaith caled'

Erbyn dydd Mercher, roedd nifer y cleifion Covid-19 yn Ysbyty Maelor rhwng 60 a 70, yn ôl rheolwyr y bwrdd iechyd.

Mewn cyfweliad i BBC Cymru ddydd Mercher, dywedodd Cyfarwyddwr Meddygol Gweithredol y bwrdd, David Fearnley fod mwyafrif y cleifion Covid-19 yn Ysbyty Maelor wedi dal y feirws yn yr ysbyty.

Ychwanegodd fod y cynnydd yn nifer achosion yn ddatblygiad "difrifol iawn" ac "mae'n mynd i fod yn waith caled" i fynd i'r afael â'r sefyllfa.

Dywedodd Cyfarwyddwr Nyrsio a Bydwreigiaeth y bwrdd, Gill Harris, hefyd fod "nifer fach" o achosion hefyd yn ysbytai cymunedol Glannau Dyfrdwy, Y Waun a'r Wyddgrug, a bod "nifer o fesurau mewn grym" i'w helpu i reoli'r risg.

Cafodd 3,640 o brofion Covid-19 eu cynnal ar draws Cymru ddydd Mawrth.

Mae cyfanswm yr holl brofion sydd wedi eu cynnal bellach yn 372,863.

236,429 yw cyfanswm y bobl sydd wedi eu profi hyd yn hyn, ac fe gafodd 219,206 ganlyniadau negatif.