Cynghrair Europa: Y Seintiau Newydd 3-1 MŠK Žilina

Fe ymunodd Louis Robles â'r Seintiau o'r Bala dros yr haf

Fe sicrhaodd dwy gôl yn amser ychwanegol fuddugoliaeth i'r Seintiau Newydd yn rownd ragbrofol Cynghrair Europa.

Roedd gôl Leo Smith a chic o'r smotyn Adrian Cieslewicz yn ddigon i drechu MŠK Žilina o Slofacia yn Neuadd y Parc, Croesoswallt.

Roedd hi'n ddi-sgôr ar yr hanner, ond y tîm cartref darodd gyntaf wedi'r egwyl, gyda Louis Robles yn rhwydo ar ôl 56 munud.

Fe unionodd yr ymwelwyr y sgôr diolch i gic o'r smotyn Patrik Myslovic gyda llai na chwarter awr o'r 90 munud yn weddill.

Ond fe rwydodd y Cymro Cymraeg o Borthmadog, Smith ac yna'r asgellwr profiadol Cieslewicz - y ddau yn gyn-chwaraewyr Wrecsam - i sicrhau bod y Seintiau yn camu i'r ail rownd.