Llofrudd Lynette White yn cael ei symud i garchar agored

Fe gafodd Jeffrey Gafoor ei ganfod yn euog o lofruddio Lynette White yn 2003

Mae argymhelliad i symud llofrudd Lynette White i garchar agored wedi cael ei gymeradwyo.

Cafodd Jeffrey Gafoor ddedfryd o garchar am oes yn 2003 gyda lleiafswm o 13 blynedd o dan glo am y llofruddiaeth yn 1988.

Roedd y Bwrdd Parôl wedi dweud bod Gafoor yn "addas" ar gyfer carchar agored, a fyddai'n ei baratoi o bosib i gael ei ryddhau.

Mae'r Weinyddiaeth Gyfiawnder wedi cadarnhau i BBC Cymru eu bod wedi cymeradwyo'r argymhelliad.

Cafodd Gafoor, sydd erbyn hyn yn 55 oed, ei ddal gan ddefnyddio technegau DNA newydd, 11 mlynedd ar ôl i euogfarnau o lofruddiaeth a roddwyd i dri dyn gael eu dileu.

Cafwyd hyd i Lynette White wedi ei llofruddio ar Ddydd San Ffolant ym 1988

Cafodd Tony Paris, Yusef Abdullahi a Stephen Miller - a ddaeth yn adnabyddus fel Tri Caerdydd - eu carcharu am oes yn 1990 am lofruddiaeth Ms White a'u rhyddhau ym 1992.

Cafodd Ms White, 20 oed, ei thrywanu fwy na 50 gwaith gan Gafoor mewn fflat yn ardal y dociau yng Nghaerdydd ym 1988.

• Gwrthod parôl i lofrudd Lynette White

• £900,000 ar adroddiad am ddiddymu achos

• Camweinyddu cyfiawnder: 'Cosbau llymach'

Roedd llefarydd ar ran y Bwrdd Parôl wedi dweud eu bod "yn fodlon bod y risg i'r cyhoedd wedi lleihau'n ddigonol ei fod yn addas ar gyfer carchar agored".

Ond argymhelliad yn unig oedd hynny a'r Weinyddiaeth Gyfiawnder sydd wedi gwneud y penderfyniad terfynol.

Nid oedd y weinyddiaeth yn fodlon datgelu dyddiad y symud.

Digwyddodd y llofruddiaeth yn 7 Stryd James (yr adeilad ar y pen ar y dde) yn agos at ble mae Canolfan Mileniwm Cymru bellach yn sefyll

Dywedodd llefarydd y Weinyddiaeth Gyfiawnder bod y Gwasanaeth Carchardai "yn cadw'r gallu i ddychwelyd troseddwyr i garchar caeëdig ar yr arwydd cyntaf o unrhyw bryder".

Yn ôl canllawiau'r Weinyddiaeth Gyfiawnder "dim ond mewn amgylchiadau cyfyngedig iawn y mae argymhellion y Bwrdd Parôl yn cael eu gwrthod".

Cyfaddefodd Gafoor iddo drywanu Ms White mewn ffrae dros £30 ar ôl i dechnoleg DNA newydd arwain Heddlu De Cymru ato yn 2003.

Wrth ddedfrydu Gafoor, dywedodd y barnwr ei fod wedi "caniatáu i ddynion diniwed fynd i'r carchar" am drosedd yr oedd yn gwybod ei fod wedi'i chyflawni.

Yn ôl y Bwrdd Parôl, pwrpas cyfnod mewn carchar agored yw "caniatáu i faterion o bryder gael eu profi mewn amodau sy'n agosach i'r rhai sydd i'w cael yn y gymuned, er mwyn rhoi cyfle i garcharorion gymryd mwy o gyfrifoldeb am eu gweithredoedd, ac i ddatblygu cynllun i'w rhyddhau".

O'r chwith uchaf, i gyfeiriad y cloc: Cafwyd Tony Paris, Yusef Abdullahi a Stephen Miller yn euog ym 1989, cafwyd Ronnie a John Actie yn ddieuog