Cynghorau yn wynebu cost o £325m yn wyneb y pandemig

Mae cynghorau wedi gweld £165m o gynnydd yn eu gwariant ers mis Ebrill

Mae costau cynghorau Cymru wedi cynyddu £325m dros chwe mis cyntaf pandemig Covid-19, yn ôl y corff craffu Archwilio Cymru.

Dywed adroddiad fod yr awdurdodau lleol wedi gweld £165m o gynnydd yn eu gwariant ac £160m o ostyngiad yn eu hincwm ers mis Ebrill.

Yn ôl Archwilio Cymru roedd y cynnydd mwyaf mewn costau ym meysydd addysg a gwasanaethau cymdeithasol.

O ran incwm, roedd gostyngiad ym meysydd gwasanaethau hamdden a gwasanaethau diwylliannol.

• Cymryd 'cenhedlaeth' i gynghorau dalu am Covid-19

• Covid-19: Cynghorau i dderbyn arian ychwanegol

Dywedodd Archwilio Cymru fod arian ychwanegol gan Lywodraeth Cymru wedi lliniaru ychydig ar y sefyllfa ond "fe allai yna fod bwlch ariannol sylweddol" gweddill y flwyddyn ariannol, a "hynny yn ddibynnol ar natur y pandemig".

Ym mis Mai dywedodd Cymdeithas Llywodraeth Leol Cymru y gallai gymryd hyd at genhedlaeth gyfan i gynghorau dalu am gost y pandemig.

Dywedodd adroddiad Archwilio Cymru yn y tymor byr a chanolig mae'n debygol y bydd:

• Gwasanaethau yn gweld cynnydd yn y gost o ddarparu offer diogelwch personol;

• Incwm o ganolfannau hamdden a meysydd parcio yn cael eu heffeithio;

• Incwm Treth y Cyngor yn gostwng oherwydd effaith economaidd y pandemig.