Covid-19: Cynnydd yn nifer y marwolaethau yng Nghymru

Bu cynnydd eto yn nifer y marwolaethau sy'n gysylltiedig â coronafeirws yng Nghymru.

Yn ôl ffigyrau diweddaraf y Swyddfa Ystadegau Gwladol cofnodwyd 47 marwolaeth yn yr wythnos hyd at 16 Hydref - cynnydd o 10 o'r wythnos flaenorol.

Dyma'r ffigyrau fesul ardal Bwrdd Iechyd:

• Bwrdd Iechyd Cwm Taf Morgannwg: 15 marwolaeth

• Aneurin Bevan: 10

• Betsi Cadwaladr a Chaerdydd a'r Fro: 5 yr un

• Bae Abertawe: 3

O'r marwolaethau a gofnodwyd mewn ysbytai, roedd 10 ohonynt yn ardal Rhondda Cynon Taf.

Mae'r hyn a elwir yn 'farwolaethau gormodol' - 'excess deaths' - sy'n cymharu pob marwolaeth gofrestredig gyda'r blynyddoedd blaenorol, yn uwch na'r cyfartaledd pum mlynedd ar gyfer yr wythnos ddiweddaraf.

Mae edrych ar nifer y marwolaethau fyddai'n digwydd yn arferol ar yr adeg yma o'r flwyddyn yn cael ei ystyried yn linyn mesur defnyddiol o ddatblygiad y pandemig.

Cofnodwyd cyfanswm o 688 o farwolaethau yng Nghymru yn y cyfnod, sydd yn 58 yn uwch na'r cyfartaledd pum mlynedd.

Yng Nghymru a Lloegr roedd cyfanswm o 10,534 o farwolaethau yn yr un cyfnod - 580 yn fwy na'r wythnos flaenorol.