Teyrnged i ddynes fu farw mewn gwrthdrawiad

Dywed teulu Sharn Iola Hughes fod eu "calonnau wedi'u torri"

Mae teulu dynes 58 oed fu farw mewn gwrthdrawiad ger Castell Gwrych, Abergele nos Sadwrn wedi rhoi teyrnged iddi hi.

Cafodd Sharn Iona Hughes o Brestatyn ei lladd yn syth pan gafodd ei tharo gan gar Volvo glas ar yr A547 am tua 17:00 ar 21 Tachwedd.

Mewn datganiad, dywedodd ei theulu a'i ffrindiau: "Sharn oedd merch ieuengaf John a Gloria Bevan... roedd yn wraig i Elfyn Hughes ac yn fam gariadus i Aaron ac Annah.

"Roedd Sharn mor anhunanol ac roedd ganddi agwedd lawen ac elusennol at fywyd.

"Roedd yn y broses o drefnu dosbarthu pecynnau bwyd i'r banc bwyd lleol drwy Sefydliad y Merched. Byddwn yn colli ei charedigrwydd am byth.

"Roedd am weld y goleuadau yng Nghastell Gwrych, a dyna yn anffodus arweiniodd at ei marwolaeth gynamserol ar ffordd brysur. Mae ein calonnau wedi'u torri."

Mae Heddlu'r Gogledd yn parhau i apelio am dystion i'r digwyddiad, neu unrhyw un sydd â lluniau 'dashcam' i gysylltu gyda nhw.

Dylai unrhyw un all fod o gymorth i'r ymchwiliad ffonio'r Uned Blismona Ffyrdd ar 101.