'Trafod cynnal I'm a Celebrity yng Nghastell Gwrych eto'

Mae'r gyfres wedi codi proffil yr iaith, meddai Garffild Lloyd Lewis oedd yn un o'r ymgynghorwyr

Mae BBC Cymru yn deall fod ITV yn cynnal trafodaethau gyda'u partneriaid yng ngogledd Cymru i gynnal y gyfres 'I'm a Celebrity Get Me Out Of Here' yng Nghastell Gwrych unwaith eto yn 2021.

Yn ôl ymgynghorydd ar raglen y llynedd, Garffild Lloyd Lewis, mae yna "bendant drafodaethau wedi bod yn digwydd", rhwng ITV a'u partneriaid.

Bu'n rhaid i'r gyfres gael ei chynnal yng Nghymru yn 2020 yn hytrach nag Awstralia o ganlyniad i'r pandemig rhyngwladol.

Dywedodd ITV nad ydyn nhw am wneud sylw am y tro.

'Bydd rhaid dod i benderfyniad buan ar gynhyrchiad mor fawr,' medd Garffild Lloyd Lewis

Wrth siarad ar raglen y Post Prynhawn BBC Radio Cymru, dywedodd Mr Lewis ei fod o ar ddeall bod y trafodaethau'n digwydd gan fod gallu teithio i Awstralia yn annhebygol.

"Dwi 'di siarad efo rhywun ar ran y castell bore 'ma a mi wnaethon nhw gadarnhau mai yn bendant i Gastell Gwrych y byddan nhw am ddod 'nôl os na fyddant yn mynd i Awstralia.

"Mae 'na ddyfalu wedi bod yn y wasg yn y dyddiau diwethaf ac yn bendant fe allai gadarnhau beth dwi'n ei wybod sef bod 'na drafodaethau yn digwydd."

Roedd y cyflwynwyr Ant a Dec yn croesawu pobl i Gymru bob nos yn Gymraeg ar y rhaglen I'm A Celebrity y llynedd

Ychwanegodd Mr Lewis ei fod yn credu y byddai'n rhaid i'r penderfyniad terfynol ddigwydd yn "fuan".

"Dwi'n tybio y byddai'n rhaid i'r penderfyniad gael ei wneud yn weddol fuan, gan fod amser cynhyrchu ar gyfres mor fawr â hon yn cymryd dipyn o amser."

'Dyfalu yw hyn' medd ITV

Y llynedd dywedodd llefarydd ar ran Castell Gwrych fod y gyfres wedi cyfrannu £1m i'r economi leol yn ardal Abergele.

"Does 'na'm amheuaeth y byddai 'na groeso yn Abergele", meddai Garffild Lloyd Lewis.

"Mi oedd na dipyn o ddefnydd o'r Gymraeg yn y gyfres ac mi oedd hynna wedi codi proffil y Gymraeg ym Mhrydain a thu hwnt," ychwanegodd.

Wrth ymateb i'r honiadau dywedodd llefarydd ar ran ITV na fyddai nhw'n darparu unrhyw ymateb ac mai "dyfalu" oedd pobl ar hyn o bryd.

Ychwanegodd y sianel y bydden nhw'n darparu rhagor o wybodaeth petai datganiad i'w wneud ar ddyfodol y rhaglen yng Nghymru.

Dywedodd Mr Lewis fod hi'n anodd rhagdybio amserlen bendant ond mae'n amau y bydd yn rhaid i'r sianel wneud "penderfyniad yn fuan" o ystyried maint y cynhyrchiad.