Carcharu dyn a laddodd ei wraig yn ystod cyfnod clo

Mae dyn a laddodd ei wraig ychydig ddyddiau wedi dechrau'r cyfnod clo cyntaf wedi cael dedfryd o bum mlynedd o garchar ar ôl pledio'n euog i ddynladdiad ar y sail nad oedd yn ei iawn bwyll.

Dyfarnodd rheithgor yn Llys y Goron Abertawe ddydd Llun bod Anthony Williams, 70, yn ddieuog o lofruddio'i wraig 67 oed, Ruth Williams.

Cafodd ei thagu i farwolaeth wedi ffrae yn eu cartref ar 28 Mawrth 2020.

Clywodd y llys bod Williams wedi dioddef gorbryder ac iselder, ac wedi methu cysgu am sawl noson oherwydd pryderon ynghylch ei iechyd, coronafeirws ac arian.

Bu farw Ruth Williams yn ei chartref yng Nghwmbrân

Dywedodd y Barnwr Paul Thomas: "Roedd hwn yn achos trasig ar sawl lefel.

"Y drasiedi fwyaf o bell yw bod bywyd gwraig 67 mlwydd oed oedd mewn iechyd da wedi dod i ben dan law dyn roedd wedi ei garu am bron hanner can mlynedd.

"Mae hefyd yn drasiedi y bydd gweithred cwpwl o funudau, un wnaethoch chi ei ddifaru yn syth, yn eich diffinio am weddill eich oes. Ac mae'n drasig eich bod nawr wedi gadael eich merch heb ei mam annwyl."