Gohirio Gŵyl Cerdd Dant Cymru eto tan 2022

Mae Gŵyl Cerdd Dant Cymru wedi ei gohirio am flwyddyn arall oherwydd argyfwng coronafeirws.

Fel yn 2020 roedd yr ŵyl eleni i fod i gael ei chynnal yn Llanfyllin ar 13 Tachwedd.

Dywedodd Llio Penri, cadeirydd pwyllgor gwaith Cymdeithas Cerdd Dant Cymru: "Eto eleni, roedd pwyllgor gwaith y Gymdeithas Cerdd Dant yn gwbl unfrydol yn y penderfyniad i ohirio Gŵyl Cerdd Dant Bro Nansi ynghyd â gweithgareddau eraill y Gymdeithas.

"Er y siom, roedd y penderfyniad rhagofalus hwn yn anorfod.

"Roedd ymwybyddiaeth o'n cyfrifoldeb i barhau i ddiogelu iechyd y cyhoedd yn y cyfnod blin hwn yn llywio pob penderfyniad."

Y tro diwethaf i'r ŵyl gael ei chynnal yn Llanfyllin yn 1967 bu'n rhaid ei gohirio bryd hynny oherwydd Clwy'r Traed a'r Genau.

Mae'r wyl yn denu cannoedd o gystadleuwyr bod blwyddyn

Y dyddiad newydd ar gyfer yr ŵyl yw Tachwedd 2022.

Dywedodd John Eifion Jones, trefnydd y Gwyliau Cerdd Dant, nad oedd dewis arall o gofio "yr ansicrwydd pryd y bydd partïon a chorau yn cael ail-ddechrau ymarfer".

"Er mwyn cynnal yr ŵyl yn llwyddiannus rydym angen cyfnod o amser i baratoi ac i gynnal gweithgareddau i godi arian, ond ar hyn o bryd nid yw'r amgylchiadau presennol yn caniatáu i ni wneud hynny yn ddiogel."