Minffordd: Dyn yn y llys wedi ei gyhuddo o lofruddio ei dad

Roedd Dafydd Thomas yn ddyn busnes adnabyddus yn ardal Minffordd

Mae dyn 44 oed wedi ymddangos mewn llys wedi ei gyhuddo o lofruddio ei dad - y perchennog busnes adnabyddus ym Minffordd ger Porthmadog yr wythnos diwethaf.

Mae Tony Thomas o Benrhyn Isaf, Minffordd, Penrhyndeudraeth, wedi ei gyhuddo o ladd Dafydd Thomas, 65, ar 25 Mawrth.

Tony Thomas yn cyrraedd Llys Ynadon Llandudno ddydd Llun

Yn gwisgo siwmper lwyd a gorchudd wyneb, cadarnhaodd ei enw, ei gyfeiriad a'i ddyddiad geni yn Llys Ynadon Llandudno.

Ni ddatgelwyd unrhyw fanylion pellach am yr achos, ond awgrymodd ei dwrnai, Owain Jones, y bydd ei gleient yn pledio'n ddieuog i'r cyhuddiad.

Bydd yn ymddangos yn Llys y Goron Yr Wyddgrug ddydd Mawrth, a chafodd ei gadw yn y ddalfa yn y cyfamser.