Colofn Owain Fôn Williams: 'Ti'm yn siŵr be' sydd o dy flaen di'
- Cyhoeddwyd
Drwy gydol ymgyrch yr Ewros bydd Cymru Fyw yn cyhoeddi cyfres o flogs gan gôl-geidwad sgwad Euro 2016, Owain Fôn Williams.
Yn ei golofn gyntaf, mae'n trafod be' sy'n digwydd o fewn y garfan ar drothwy gêm gyntaf pencampwriaeth a sut fydd un o sêr y tîm yn helpu i reoli nerfau'r sgwad.
Cyn mynd i Ffrainc yn 2016 wnaethon ni golli - a cholli'n drwm - yn erbyn Sweden.
Doedd y perfformiad ddim yn grêt ac roedd yr hogia' efo'u pennau i lawr ar ôl y canlyniad, ond yn fuan iawn ar ôl cyrraedd Ffrainc y bore wedyn roeddan ni wedi anghofio am honno - a dechrau meddwl yn syth bin am chwarae Slofacia yn Bordeaux a pharatoi at honno.
Dyna dwi'n siŵr fydd yr hogia' wedi ei wneud rŵan ar ôl colli i Ffrainc a chael gêm gyfartal yn erbyn Abania. Fyddan nhw wedi anghofio am y ddwy gêm ac yn barod am Y Swistir.
Fe chwaraeodd Aaron Ramsey am awr yn erbyn Albania cyn i'r sgwad deithio i Baku
Dwi'n siŵr byddai Cymru wedi bod eisiau cael gôl yn y gemau hynny cyn mynd i Baku, ond y peth pwysicaf ydi eu bod nhw i gyd wedi dod drwyddo yn iach, a'u bod nhw wedi cael munudau dan eu belt o ran chwarae, achos tydi rhai heb chwarae ers 'chydig o wythnosau efo tymhorau pawb wedi dod i ben ar wahanol adegau.
Alli di ymarfer hynny ti eisiau, ond i gael dy hun yn match-fit ac yn barod dim jest at fory, ond hefyd at gêm arall pedwar diwrnod wedyn, a gêm arall pedwar diwrnod wedyn - alli di ddim cael y ffitrwydd yna drwy ymarfer mae angen gemau ac mae'r hogia' rŵan wedi cael hynny.
Yr 11 ar y cae
Mi fydd gan yr hogia' ryw fath o syniad pwy fydd yr 11 fydd yn dechrau ers dechrau'r wythnos faswn i'n meddwl. Be' fydd y tîm rheoli yn ei wneud ydi tynnu chwaraewyr allan o'r 11 sy'n dechrau a rhoi rhai eraill yn eu lle nhw jest i bawb gael rhyw fath o flas ar y siâp fyddan nhw'n defnyddio a'r ffordd fydd Rob Page yn disgwyl i'r hogia' chwarae.
Fyddan nhw'n gwybod erbyn heddiw, neu heno o leia, pwy fydd yn dechrau. Mae'n bwysig iawn bod y cwbl lot yn gwybod be' di'r swydd - dim jest yr 11 cynta' - achos mae unrhyw beth yn gallu digwydd mewn gêm.
Gareth Bale yn tynnu'r pwysau
Yn naturiol pan mae gen ti gêm mor fawr ar y scale yma, ti'n mynd i fod yn nerfus. Ti'm yn siŵr be' sydd o dy flaen di a ti'n gwybod y bydd miliynau yn gwylio'r gêm ar y teledu ac yn gwrando ar y radio - miliynau ar draws y byd. Mae 'na bwysau mawr.
Gwrandewch ar Owain yn trafod sut oedd Gareth Bale yn lleihau nerfusrwydd o fewn y sgwad
Be' sy'n dda a be' nes i sylwi o'm mhrofiad i ydi mae gen ti rai fel Gareth Bale a Ramsey sydd wedi chwarae ar y lefel uchaf fedri di.
Dwi'n cofio pan oeddan ni'n chwarae yn erbyn Lloegr, y gêm fwya' oedd o'n blaenau ni yn Ewro 2016, a ro'n i'n disgwyl i bawb fod dipyn bach ar edge a nerfus. Tua 45 munud cyn i ni fynd am y stadiwm roddodd Gareth Bale gnoc ar fy nrws i a dyma fi'n agor y drws a gofyn 'Be tisho?'. Dyma fo'n dweud 'Pwy sy'n mynd i guro'r US Open - y golff?'
Ro'n i'n meddwl 'Da ni'n mynd i chwarae yn erbyn Lloegr yn munud boi!' ond be' oedd o'n wneud oedd newid agwedd yr hogia i dynnu yr edge o'r nerfusrwydd o'r gêm a phwysau oedd yr holl media yn ei roi ar y gêm.
Un o luniau Owain Fôn Williams, sydd hefyd yn artist, o'i daith Cymru yn Euro 2016
Fydd yr hogia' yn nerfus does dim dwywaith am hynny, doedd rhai ohonyn nhw ddim yn Euro 2016 felly does ganddyn nhw ddim profiad o gwbl o fod mewn twrnamaint fel yma - felly mae'r profiad sydd gan y hogia' sydd wedi bod yn ofnadwy o bwysig.
Pwy fydd golwr Cymru?
Pa un fydd yn chwarae ddydd Sadwrn - Wayne Hennessey neu Danny Ward? Mae'n anodd ofnadwy oherwydd mae Wayne Hennessey wedi rhoi Cymru yn ôl yn Euro 2020 - y fo sydd wedi chwarae mwyafrif y gemau yn yr ymgyrch felly fasa ti'n meddwl yn naturiol mai fo sy'n dechra' yn y gôl.
Mae ei brofiad o yn anhygoel - 96 o gapiau dros y wlad, bob tro rhwng y pyst mae o'n gadarn, mae o'n steady... be' arall tisho mewn gôl-geidwad?
Danny Ward yn arbed cic o'r smotyn yn erbyn Ffrainc: ydi o wedi gwneud digon i hawlio'r crys yn ngêm gynta'r Ewros?
Wedyn ti'n sbïo ar Danny Ward, ac mae o wedi disgwyl am ei gyfle. Pan wnaeth Wayne Hennessey frifo, Adam Davies roddodd Ryan Giggs yn y gôl.
Yn anffodus iddo fo gafodd o anaf yr un pryd â Wayne Hennessey a dyna pryd gafodd Danny Ward ei gyfle ac mae o wedi gafael yn y cyfle efo dwy law - mae o wedi gwneud yn arbennig o dda i Gymru.
Peth arall efo Danny Ward ydi, mae o'n gallu delio efo pwysa'. Fo wnaeth ddechrau i Gymru yn erbyn Slofacia yn Bordeaux i agor y sioe yn Ffrainc.
Felly ydi rhywun yn mynd efo profiad Wayne Hennessey neu'r dyn sydd heb wneud dim byd o'i le ac sydd efo'i afael yn y crys - sef Danny Ward? Mae'n mynd i fod yn ddewis anodd ofnadwy.
Hefyd o ddiddordeb: