Apelio am dystion wedi damwain angheuol

Mae Heddlu Dyfed Powys yn apelio am dystion wedi damwain ffordd angheuol yn Sir Benfro.

Bu farw un person a chafodd tri arall anafiadau difrifol pan fu tri char mewn gwrthdrawiad ar y B4341 rhwng Hwlffordd ac Aberllydan (Broadhaven) o gwmpas 20:25 nos Sul.

Digwyddodd y gwrthdrawiad rhwng Citroen C1 glas, Ford Ka gwyn a Seat Ibiza gwyn.

Bu farw un person oedd yn y Ford Ka yn y fan a'r lle, a chaewyd y lôn dros nos.

Tri gydag anafiadau difrifol

Mae teulu'r person fu farw wedi cael gwybod ac yn derbyn cefnogaeth gan swyddogion heddlu arbenigol.

Cafodd dau ddyn ac un fenyw eu cludo i'r ysbyty gydag anafiadau difrifol.

Cafodd y lôn ei hailagor am 10:00 fore Llun.

Mae'r heddlu'n apelio am unrhyw wybodaeth yn cynnwys lluniau dashcam a allai fod o help yn eu hymchwiliad.

Cysylltwch â Heddlu Dyfed Powys drwy ffonio 101; ar ebost: [e-mail], neu drwy fynd ar eu gwefan.