Medalau aur cyntaf i Gymry yn Tokyo

Matthew Richards (ail o'r dde) gyda gweddill y tîm 4x200m dull rhydd

Yn oriau mân fore Mercher y daeth y medalau aur cyntaf i athletwyr o Gymru yn y Gemau Olympaidd yn Tokyo.

Y pwll nofio oedd y lleoliad, ac roedd Matthew Richards yn nhîm y dynion yn y ras gyfnewid 4x200m dull rhydd.

Roedd y fuddugoliaeth yn hawdd yn y diwedd, gyda'r tîm o Brydain dros dair eiliad glir ar y blaen i dîm Pwyllgor Olympaidd Rwsia.

Fe wnaeth Cymro arall, Calum Jarvis, nofio yn y rowndiau rhagbrofol er nad oedd yn y ffeinal ei hun, ond fe fydd yntau hefyd yn derbyn medal fel aelod o'r garfan.

Dyma'r tro cyntaf i rhywun o Gymru ennill medal aur am nofio yn y Gemau Olympaidd ers 1912.

'Cwblhau'r set'

Daeth llongyfarchiadau gwresog i'r ddau gan y gyn nofwraig Olympaidd o Gymru, Georgia Davies.

Dywedodd: "Rwy mor browd o'r bechgyn - fi methu credu fe. Gemau Olympaidd cynta i'r ddau ohonyn nhw a chipio medal aur.

"Chi methu breuddwydio am rhywbeth gwell na hyn.

"Mae Matt yn dalent enfawr ac mae mor ifanc - mae gyrfa wych o'i flaen. Mae Calum yn rhan bwysig iawn o'r tîm ras gyfnewid hyn. Mae wedi bod yn rhan o'r tîm dros y blynyddau diwethaf ac mae wedi ennill medalau ym mhob cystadleuaeth heblaw am yr Olympics a nawr mae wedi cwblhau y set... dwi mor mor falch."

Tom Barras (ail o'r dde) yn derbyn ei fedal arian

Roedd medal arian i Gymro arall, Tom Barras, fel aelod o dîm sgwlio pedwarplyg (quadruple sculls) Prydain.

Y tri aelod arall oedd Harry Leask, Angus Groom, a Jack Beaumont.

Mewn ras agos fe wnaeth y pedwar ddal eu gafael ar yr ail safle er gwaethaf sialensau hwyr gan Awstralia a Gwlad Pŵyl.