Skylrk o Ddyffryn Nantlle yn ennill Brwydr y Bandiau

Skylrk, sef prosiect cerddoriaeth Hedydd Ioan o Ddyffryn Nantlle, sydd wedi ennill Brwydr y Bandiau 2021.

Mae Hedydd yn ffan mawr o gerddoriaeth a dweud straeon, a'i fwriad gyda'r prosiect hwn yw cyfuno'r ddau beth.

Ar hyn o bryd mae'n brentis gyda chwmni y Frân Wen ac fel cynhyrchydd dywed ei fod yn hoff iawn "o greu pethau".

Yn Nhachwedd 2020 fe enillodd Hedydd Ioan wobr Gwneuthurwr Ffilm Ifanc y flwyddyn yng Ngwobrau'r Cinemagic 2020 Young Filmmaker yn Belffast.

Dywed bod nifer o ddylanwadau cerddorol ar ei waith - yn eu plith gweithiau gan Datblygu, Kanye West, Y Cyrff a MF Doom.

Mae'n gobeithio bod y cyffro mae'n ei deimlo pan mae'n clywed cerddoriaeth o'r fath yn trosi i brosiect Skylrk.

Cafodd enw'r enillydd ei gyhoeddi ar raglen Huw Stephens nos Iau.

Dywed trefnwyr y gystadleuaeth - yr Eisteddfod a Maes B - bod nifer o fandiau wedi cystadlu ac i ddechrau cafodd rhestr fer o ddeg band ei ffurfio.

Mae modd gwylio perfformiadau'r deg hynny ar sianel YouTube Maes B.

Y pedwar a ddaeth i rownd derfynol Brwydr y Bandiau 2021

Nos Fercher fe wnaeth rhaglen Lisa Gwilym gyhoeddi pa bedwar band oedd wedi cyrraedd y rownd derfynol - y beirniaid eleni oedd Ifan Davies ac Elan Evans.

Y tri arall a wnaeth gyrraedd rhestr y pedwar olaf oedd Tiger Bay - band indie-roc o Gaerdydd, Cai, a Band Mabon, Dylan, Rhys, Owen a Ieuan - sy'n ddisgyblion yn Ysgol Plasmawr yng Nghaerdydd.