Cyfarwyddwr ifanc yn ennill gwobr am ffilm o'r cyfnod clo
- Cyhoeddwyd
Fe wnaeth Hedydd Ioan, 17, sgriptio, ffilmio, ac actio yn ei ffilm fer
Mae gŵr ifanc o Wynedd wedi ennill gwobr Gwneuthurwr Ffilm Ifanc y flwyddyn yng Ngwobrau'r Cinemagic 2020 Young Filmmaker yn Belfast.
Fe wnaeth Hedydd Ioan, 17, o Benygroes, ddod i'r brig mewn ffilm oedd o wedi ei sgriptio, ffilmio, ac actio ynddi.
Roedd y cynhyrchiad, gafodd ei gomisiynu gan Cymru Fyw fel rhan o gyfres o ffilmiau byrion gan bobl ifanc, yn edrych ar anhawster cyfathrebu a chynnal perthynas oherwydd cyfyngiadau Covid-19.
Dywedodd Hedydd: "Dwi mor falch efo'r ymateb i'r ffilm, wrth greu darnau fel yma y gobaith ydi eu bod nhw'n gallu llwyddo i gysylltu efo pobl ar lefel emosiynol a ddynol."
Mae Y Flwyddyn Goll wedi ei dewis ar gyfer gwyliau ffilmiau eraill yn Llundain, Toronto a'r Unol Daleithiau, ac mae Hedydd hefyd newydd ei wobrywo yn un o Sêr y Dyfodol yng ngwobrau Into Film.
Gwyliwch ffilmiau byrion eraill Haf Dan Glo
Mae Hedydd ar brentisiaeth gyda chwmni theatr Frân Wen
Dywedodd Hedydd am ei ffilm: "Dwi'n teimlo fod y ffordd mae pobl ifanc yn cysylltu yn anhygoel o ddiddorol, a sut mae hynny yn effeithio ar ein bywydau ac yr y digwyddiadau a phrofiadau rydym yn cael.
"Yn ystod y cyfnod yma mae bob dim wedi cael ei wthio i'r eithaf ac fe benderfynais edrych ar y cysylltiad rhwng rhywun yn trio siarad a rhannu ei deimladau efo rhywun arall yn ganol y clo yma."
Hefyd o ddiddordeb: