Andy Morrison yn gadael Cei Connah 'mewn lle cryf iawn'

Mae Andy Morrison wedi dweud ei fod yn gadael Cei Connah "mewn lle cryf iawn", ar ôl cyhoeddi ei fod yn ymddiswyddo fel rheolwr y clwb ar ôl chwe blynedd.

Yn y cyfnod hwnnw fe lwyddodd y Nomadiaid i ennill Cwpan Cymru yn 2018, ac yna'r Cymru Premier yn 2020 a 2021.

Pan gymerodd Morrison, 51, yr awenau roedd Cei Connah ar waelod Uwch Gynghrair Cymru - fel oedd hi'n cael ei 'nabod ar y pryd.

Ond fe lwyddodd i droi'r tîm yn un oedd yn cystadlu ar frig y gynghrair ac yn cyrraedd cystadlaethau Ewropeaidd yn gyson.

Ymhlith eu buddugoliaethau mwyaf nodweddiadol yn Ewrop roedd trechu Stabæk o Norwy yn 2016, a Kilmarnock o'r Alban yn 2019.

Llwyddodd y clwb hefyd i gyrraedd rownd derfynol Cwpan Her yr Alban yn 2019, cyn ennill y gynghrair yng Nghymru ddwywaith gan dorri rhediad hirfaith Y Seintiau Newydd.

Ar ôl saith gêm y tymor yma mae'r clwb yn chweched yn y tabl, wyth pwynt y tu ôl i'r Seintiau ar y brig.

"Yr wythnos yma rydyn ni wedi llwyddo i ennill dwy gêm gwpan anodd, rydyn ni dri phwynt yn brin o safle Ewropeaidd hyd yn oed mor gynnar â hyn, ac mae'r garfan gyfan yn ffit unwaith eto," meddai Morrison.

"Felly dwi'n pasio'r awenau draw i bwy bynnag sy'n cymryd drosodd mewn lle cryf iawn, a dwi'n dymuno pob dymuniad da i'r clwb yn y dyfodol."