Carcharu giang am gynllwyn i herwgipio plentyn

Mae giang wnaeth gynllwynio i herwgipio plentyn ar Ynys Mon ym mis Tachwedd 2020 wedi eu dedfrydu i gyfanswm o 63 o flynyddoedd 'dan glo.

Ym mis Awst eleni fe gafwyd tri yn euog o'r drosedd tra bod tri arall eisoes wedi cyfadde'r cyhuddiad.

Fe gafodd Anke Hill, 51 oed, a wnaeth gipio'r plentyn o'r stryd dedfryd o 14 mlynedd a 5 mis.

Derbyniodd Wilfred Wong, 56 - wnaeth fygwth fam maeth y plentyn gyda chyllell - 17 o flynyddoedd am gynllwynio i herwgipio a bod ag arf yn ei feddiant.

Wrth dedfrydu yn Llys y Goron Caernarfon ddydd Iau dywedodd y barnwr Nicola Jones fod y cynllwyn yn un "soffistigedig oedd wedi ei baratoi yn drylwyr".

Fe wnaeth y giang herwgipio'r plentyn gan fod un ohonyn nhw'n credu bod y plentyn wedi dioddef camdriniaeth satanaidd.

Cafodd car gyda phlatiau ffug ei stopio gan Heddlu Sir Northampton ym mis Tachwedd 2020

Fe wnaeth Janet Stevenson, 67 a'i gwr Edward Stevenson, 69 o ardal Crawley, de Lloegr ddedfrydau o 15 mlynedd ac wyth mlynedd am logi car i gludo'r plentyn i dde-ddwyrain Lloegr fel rhan o'r cynllwyn.

Fe dderbyniodd Jane Going-Hill, 60 a Kristine Ellis-Petley, 58, y ddwy yn byw yng Nghaergybi, pedair blynedd ac wyth mis a phedair blynedd am dreulio cyfnod ar y pontydd rhwng Ynys Môn a'r tir mawr yn gwylio am unrhyw weithgaredd gan yr Heddlu ac am eu rhan pellach yn y cynllwyn.

Niwed seicolegol

Yn yr achos dedfrydu ddydd Iau, fe glywodd Llys y Goron Caernarfon sut oedd yr achos wedi achosi niwed seicolegol mawr i'r plentyn, nad oes modd ei enwi am resymau cyfreithiol.

"Roedd y plentyn yn cal hunllefau cyson ac yn bryderus iawn," clywodd y llys.

"Roedd yn wyliadwrus o eraill ac yn poeni'n gyson."

Wrth dedfrydu dywedodd y Barnwr Nicola Jones fod effaith gweithredoedd yr unigolion wedi bod yn enfawr ac wedi effeithio ar nifer.

"Mae bywyd ifanc y plentyn yma wedi ei ddifetha o'ch achos chi," meddai.

"Mae'r plentyn a'r teulu maeth wedi dioddef yn seicolegol oherwydd hyn. Mae'r hyn da chi wedi gwneud wedi achosi gymaint o niwed seicolegol efallai neith y plentyn fyth wella."