Marwolaeth bachgen, 3, mewn tân carafán yn ddamwain

Bu farw Zac (chwith) yn y digwyddiad, ac roedd ei frawd Harley mewn cyflwr difrifol wedi'r tân

Bu farw bachgen tair oed oedd mewn carafán aeth ar dân yng Ngheredigion drwy ddamwain, yn ôl crwner.

Roedd Zac Michael Harvey yn cysgu yn y garafán yn Ffair Rhos pan ddigwyddodd y tân ar 19 Ionawr 2020.

Clywodd y cwest ei fod wedi marw o ganlyniad i anadlu mwg.

Llwyddodd ei dad a'i frawd, Shaun a Harley Harvey, i ddianc o'r garafán.

• Bachgen i 'ddringo Everest' wedi tân laddodd ei frawd

Clywodd y cwest ei bod yn debygol mai gwresogydd trydan, neu ddeunydd llosgadwy yn dod i gysylltiad â'r gwresogydd, oedd achos y tân.

Mewn tystiolaeth i Heddlu Dyfed-Powys, dywedodd Shaun Harvey ei fod yn defnyddio'r gwresogydd i gynhesu'r garafán, ond ei fod yn credu iddo ei ddiffodd cyn mynd i gysgu.

Roedd y gwresogydd wedi ei bweru gan gebl o dŷ cyfagos.

Yn ddiweddarach, cafodd ei ddeffro gan dân ffyrnig, ac nid oedd yn gallu symud ei ddau fab mewn pryd.

Nid oedd disgwyl i frawd Zac, Harley, oroesi ei anafiadau, ond mae wedi gwella'n llawn.

Rhoddodd y crwner Peter Brunton ei gydymdeimlad i fam Zac, Erin - a oedd yn y gwrandawiad - gan gofnodi achos y farwolaeth fel damwain.