'Chwerthin' a 'hwyl' wrth ymosod ar feddyg mewn parc

Bu farw Dr Gary Jenkins 16 o ddiwrnodau wedi'r ymosodiad ym Mharc Bute

Mae rheithgor wedi clywed bod tri pherson wedi "chwerthin" ac ymddwyn fel eu bod "yn cael hwyl" wrth ymosod ar seiciatrydd ym Mharc Bute, Caerdydd.

Clywodd Llys y Goron Merthyr Tudful recordiad o gyfweliad heddlu gyda dyn oedd yn y parc ar y noson y cafodd Dr Gary Jenkins ei guro a'i "adael i farw" fis Gorffennaf y llynedd.

Dywedodd Louis Williams wrth y llu ei fod wedi ceisio amddiffyn Dr Jenkins trwy "gwrcwd" a "chreu rhwystr" ond bod dau ddyn a merch ifanc wedi troi arno yntau.

Mae Lee Strickland, 36, Jason Edwards, 25, a merch 17 oed, na ellir ei henwi am resymau cyfreithiol, wedi pledio'n euog i gyhuddiadau o ddynladdiad a lladrata ond yn gwadu llofruddio.

• Parc Bute: Dyn wedi marw 16 diwrnod ar ôl ymosodiad

Dywedodd Mr Williams wrth dditectifs ei fod wedi bod yn y parc am rai oriau pan ddaeth cythrwfl i'w sylw.

"Wnes i glywed gweiddi a rhegi," dywedodd. "Roedd yn swnio'n ymosodol... fel ymladd neu ffrae."

Fe welodd dyn ar y llawr a thri pherson o'i amgylch, yn tynnu ei fag ac yn ei gicio a'i ddyrnu.

Presenoldeb heddlu oriau wedi'r ymosodiad ar Dr Jenkins ym Mharc Biwt

Dywedodd bod y tri'n "annog ei gilydd, yn chwerthin ac yn ymosodol", gan weiddi "ry'n ni'n dwgyd oddi arno".

Ychwanegodd: "Roedd fel petae eu bod yn cael hwyl, yn meddwl bod e'n ddoniol - roedd e jest yn fwynhad iddyn nhw."

Yn y cyfweliad a barodd am dros awr, dywedodd Mr Williams ei fod wedi gweiddi "Stopiwch" sawl tro a cheisio tynnu'r ymosodwyr oddi ar y dyn ar y llawr, a chwrcwd i geisio'i warchod.

"Fe wnaethon nhw fy nghicio," meddai. "Tybed pam wnaethon nhw ddim fy mrifo innau mwy a pam roedden nhw'n ei frifo yntau gymaint."

Lee Strickland a Jason Edwards yn cyrraedd Llys y Goron Merthyr Tudful ar ddiwrnod cyntaf yr achos

Disgrifiodd Mr Williams, wrth i'r digwyddiad fynd rhagddo, bod y dyn ar y llawr yn symud a cheisio gwrthsefyll llai a llai, a fod heb yngan yr un gair wrtho yn uniongyrchol.

Yn y pen draw fe redodd Mr Williams i chwilio am gymorth ac erbyn iddo ddychwelyd roedd yr heddlu wedi cyrraedd ac fe welodd parafeddygon yn trin y dioddefwr.

Dywedodd ei fod yn "difaru" peidio aros a gwneud mwy i amddiffyn Dr Jenkins "ond doeddwn i ddim yn llwfr, fe wnes i drial ei helpu".

Fe roddodd PC Phil Coleman dystiolaeth hefyd - yr heddwas a arestiodd Lee Strickland yn oriau man 20 Gorffennaf.

Dywedodd bod y dyn 36 oed "wedi meddwi a braidd yn gallu siarad" a phan ofynnodd PC Coleman iddo beth oedd wedi ei gymryd, dywedodd "spice ac alcohol".

Ychwanegodd PC Coleman ei fod wedi sylwi ar waed ar goes Lee Strickland. Atebodd y dyn gan ddweud: "Fy ngwaed i yw hwnna, fe wnes i dorri fy mys, dwi'n adeiladwr."

Ond, aeth yr heddwas ymlaen i egluro bod Lee Strickland wedi dweud ei fod yn ddigartref a'i fod yn y parc gan fod angen y tŷ bach arno.

Gofynnodd PC Coleman i Lee Strickland beth oedd wedi ei wneud y diwrnod hwnnw, ac atebodd: "Yr hyn dwi'n arfer ei wneud - begian a byw ar y strydoedd."

Pan gafodd Lee Strickland ei archwilio gan yr heddlu, fe ddaethont o hyd i gerdyn banc arno. Er nad oedden nhw'n ymwybodol ar y pryd, Dr Jenkins oedd yn berchen ar y cerdyn.

Cafodd Lee Strickland ei ddad-arestio rai oriau'n ddiweddarach a'i ryddhau o'r ddalfa.

Mae'r achos yn parhau.