Cynllun i ailwampio cyfreithiau'r UE yn 'tanseilio datganoli'

Mae'r gwledydd datganoledig wedi beirniadu cynllun gan lywodraeth y DU i ailwampio cyfreithiau'r Undeb Ewropeaidd.

Dywedodd Downing Street y byddai newid y cyfreithiau "hen ffasiwn" yn torri £1bn o fiwrocratiaeth i fusnesau.

Bydd Mesur Rhyddid Brexit, medd y llywodraeth, yn newid sut y gall San Steffan ddiwygio neu ddileu miloedd o reoliadau o gyfnod yr UE sy'n parhau mewn grym.

Dywedodd Boris Johnson y byddai'r symudiad yn "rhyddhau manteision Brexit" ac yn gwneud busnesau Prydain yn fwy cystadleuol.

Ond cafodd y cynllun ei feirniadu gan y gwledydd datganoledig.

Dywedodd ffynhonnell fod gweinidogion Cymru, yr Alban, a Gogledd Iwerddon yn credu bod y cynlluniau'n tanseilio'r setliad datganoli.

Ychwanegon nhw fod cyfarfod rhwng y Twrnai Cyffredinol Suella Braverman a gweinidogion datganoledig ddydd Sadwrn yn "funud olaf, yn afreolus, ac yn drwsgl".

'Brysio'r broses'

Dywedodd Mick Antoniw, Gweinidog Cymreig y Cyfansoddiad, nad oedd y llywodraeth wedi rhoi sicrwydd na fyddai'r cynlluniau yn "effeithio ar y setliad datganoli".

Wrth siarad ar BBC Radio Wales Breakfast fore Llun, dywedodd Mr Antoniw AS ei fod yn pryderu fod Llywodraeth y DU yn "brysio'r broses... heb ymgysylltiad priodol gyda chenhedloedd y DU fel yr addawyd i ni".

Dywedodd Ysgrifennydd Cabinet Llywodraeth yr Alban dros y Cyfansoddiad, Angus Robertson: "Mae hyn yn gwneud gwawd o ymrwymiad diweddar Llywodraeth y DU i ailsefydlu perthnasau gyda'r llywodraethau datganoledig."

Dywedodd Llywodraeth y DU y byddai'n "parhau i weithio'n agos gyda'r gweinyddiaethau datganoledig".

• Fforwm newydd i arweinwyr gwledydd y DU drafod

• Traffig porthladdoedd Cymru wedi gostwng 30% yn 2021

• Cymru i dderbyn £46m yn lle grantiau Ewropeaidd

Copïodd y DU y cyfreithiau er mwyn hwyluso'r broses o adael yr UE ar 31 Ionawr 2020, a'u cadw yn ystod cyfnod pontio a ddaeth i ben ym mis Ionawr 2021.

Ers mis Medi, mae'r llywodraeth wedi bod yn adolygu pa rai o'r rhain y mae am eu cadw yn eu lle, eu dileu neu eu diwygio.

Yn gynharach ym mis Ionawr, cyhoeddwyd fod Boris Johnson yn cadeirio fforwm newydd ar gyfer trafod gydag arweinwyr llywodraethau datganoledig Cymru, Yr Alban a Gogledd Iwerddon

O dan ddeddfwriaeth ymadael â Brexit a basiwyd yn 2018, mae gan gyfreithiau'r UE a gafodd eu cadw statws cyfreithiol eu hunain - a phroses arbennig ar gyfer eu newid.

Mewn cyhoeddiad i nodi dwy flynedd ers i'r DU adael yr UE, dywedodd Rhif 10 y byddai'r mesur newydd yn sicrhau bod modd gwneud newidiadau'n haws.

Nid yw'r llywodraeth wedi nodi pa gyfreithiau UE y mae'n bwriadu eu newid, ond dywedodd y byddai'n hyrwyddo "dull unigryw" at gyfraith y DU, gyda ffocws ar hyrwyddo technolegau newydd.

Dywedodd Downing Street y byddai'r newidiadau'n adeiladu ar rai eraill ers Brexit - fel symleiddio tollau alcohol a phenderfyniad i gael gwared ar y TAW o 5% ar damponau.