Dyblu budd-dal ynni i ymateb i 'argyfwng costau byw'
- Cyhoeddwyd
![Cynhesu traed](https://ichef.bbci.co.uk/ace/standard/976/cpsprodpb/72DF/production/_123070492_bfe20f0a-e3e2-4658-abe9-470f6cc6ef1b.jpg)
Mae Llywodraeth Cymru'n dyblu taliadau ar gyfer helpu rhai aelwydydd i dalu eu biliau ynni.
Bydd taliadau'r Cynllun Cymorth Tanwydd Gaeaf yn codi o £100 i £200 mewn ymateb i "argyfwng costau byw, sy'n gwaethygu".
Fe fydd y newid i bobl sy'n derbyn y Credyd Cynhwysol a budd-daliadau oedran gwaith, ac fe fydd pobl sydd eisoes wedi derbyn taliadau yn derbyn yr arian ychwanegol yn yr wythnosau nesaf.
Daw'r newid yn sgil cynnydd tebygol sylweddol yn y cap ar bris tanwydd o fis Ebrill. Mae disgwyl i lefel y cynnydd gael ei gadarnhau ar 7 Chwefror.
Mae'r cap sy'n cyfyngu ar faint gall cwmnïau godi am nwy a thrydan yn cael ei adolygu bob chwe mis ac mae yna ofnau y gallai godi 50% y tro hwn.
Fe allai hynny olygu bod y gost yn codi i aelwydydd ar gyfartaledd o £1,277 i bron £2,000 y flwyddyn.
![Cylch nwy](https://ichef.bbci.co.uk/ace/standard/976/cpsprodpb/5C72/production/_122666632_mediaitem122666270.jpg)
Y rheoleiddiwr ynni Ofgem sy'n gosod y pris uchaf y gall cwmnïau ofyn i bobl dalu am drydan a nwy
Dywedodd y Gweinidog Cyfiawnder Cymdeithasol, Jane Hutt: "Rydym yn benderfynol o wneud popeth a allwn i helpu ein pobl gyda'r biliau sydd ganddynt, a bydd hyn yn helpu i wneud hynny."
Mae'r taliadau'n rhan o gynllun gwahanol i gynllun taliadau tywydd oer Llywodraeth y DU.
Mae Cynllun Cymorth Tanwydd Gaeaf ar gael i aelwydydd ble mae o leiaf un person mewn oedran i weithio yn cael budd-daliadau lles penodol, ac yn gyfrifol am dalu biliau ynni'r eiddo.
Mae'n rhaid bod yr ymgeiswyr wedi hawlio un o'r budd-daliadau perthnasol rhwng 1 Rhagfyr 2021 a 31 Ionawr 2022.
Mae'n bosib ymgeisio hyd at 28 Chwefror ond yn ôl Llywodraeth Cymru fe fydd y cynghorau sir "wedi cysylltu â'r bobl y maent yn credu sy'n gymwys".
![Mesurydd trydan](https://ichef.bbci.co.uk/ace/standard/976/cpsprodpb/4472/production/_122722571_a38466ee-cd1c-4546-9b75-578328a78c34.jpg)
Er taw helpu aelwydydd i dalu biliau ynni yw nod y cynllun, does dim cyfyngiadau o ran sut mae'r arian yn cael ei wario.
Y llynedd fe ddywedodd Llywodraeth Cymru bod y cynllun yn costio £38m, ac yn targedu 350,000 o aelwydydd.
Nid oedd yn glir nos Lun faint y mae'r llywodraeth yn rhagweld y byddan nhw'n gwario ar y taliadau eleni, ond fe nododd ei fod yn rhan o "ein Cronfa Gymorth i Aelwydydd gwerth £51m".
Mae llefarydd Cyfiawnder Cymdeithasol Plaid Cymru, Sioned Williams wedi croesawu'r "cymorth ychwanegol ar gyfer y miloedd o bobl yng Nghymru sy'n wynebu'r dewis amhosib hwnnw rhwng gwres a bwyta".
Ond fe rybuddiodd na fydd yn cyrraedd pawb sydd ei angen, gan gynnwys "aelwydydd sydd eisoes mewn dyled o ganlyniad yr argyfwng cost byw" a phobl "sy'n byw gyda thlodi tanwydd nad sy'n derbyn budd-daliadau".
Pynciau cysylltiedig
Straeon perthnasol
- Cyhoeddwyd25 Ionawr 2022
- Cyhoeddwyd16 Ionawr 2022
- Cyhoeddwyd12 Ionawr 2022