Nathan Wyburn: Creu celf o Marmite a thost
- Cyhoeddwyd
Mae'r Cymro Nathan Wyburn yn arlunydd sydd wedi creu dipyn o enw i'w hun dros y blynyddoedd diwethaf, gyda sêr o'r byd pop a Hollywood ymysg y rhai sy'n edmygu ei waith.
Mae'r artist 32 oed o Lyn Ebwy yn creu gwaith gan ddefnyddio dulliau anarferol, a gyda deunydd anghyffredin fel glo, Marmite a gwaed ffug.
Daeth Nathan i enwogrwydd gyntaf yn 2011 pan gyrhaeddodd rownd gynderfynol Britain's Got Talent, ac ers hynny mae ei yrfa wedi mynd o nerth i nerth.
Yma mae'n ateb rhywfaint o gwestiynau ac yn esbonio beth sy'n ei ysgogi i ddefnyddio ei ddulliau celf unigryw.
Pryd ddechreuodd dy diddordeb mewn arlunio?
Ers i mi allu cofio dwi wastad wedi bod â diddordeb mewn arlunio. Pan o'n i'n fach o'n i'n arfer sketchio cloriau LPs fy nhad a thynnu lluniau o Power Rangers.
Mae lliwiau a textures wastad wedi fy nghyffroi i ac o'n i'n gweld y potensial ym mhob dim.
Nathan gyda chyflwynwyr 'This Morning', Phillip Schofield a Holly Willoughby
O'n i wrth fy modd gydag arlunio yn yr ysgol, ac roedd fy athrawon yn hynod o gefnogol i feithrin fy nhalent.
Tra'n gwneud fy nghwrs TGAU Celf, dim ond gwersi celf am awr yr wythnos roeddwn i'n ei gael gan fod 'na clashes efo pynciau eraill - dwi mor ddiolchgar i fy athrawes Sian Slater am adael imi wneud hynny! Pwy a ŵyr lle fyswn i heb y gefnogaeth yna...!
Sut mae dy fywyd wedi bod ers i ti wneud enw i ti dy hun ddegawd yn ôl?
I fod yn onest mae fy mreuddwydion wedi eu gwireddu. O'n i byth yn disgwyl bod yn gwneud yr hyn dwi'n ei wneud fel bywoliaeth.
Mae'n debyg bod neb i ddweud gwir yn credu 100% y bydd eu breuddwydion yn dod yn wir, ond mi ddigwyddodd i fi.
Cyflwyno gwaith i'r seren Hollywood o Abertawe, Catherine Zeta-Jones
Dwi 'di cael teithio'r byd, cwrdd â phobl anhygoel a chael profiadau arbennig oherwydd fy ngwaith celf.
Beth wnaeth wneud i ti arbrofi gan ddefnyddio pasta, glo a deunydd eraill?
I ddechrau, tost a Marmite oedd e. Gweles i bennawd am Simon Cowell a meddwl 'MARMITE!' Nes i roi hwnna ar YouTube ac fe saethodd y fideo, a dyna dechreuodd pethe i ddweud gwir.
Portreadau o'n i'n gyfforddus yn gwneud, ond doedd gen i ddim syniad y byddwn i'n dal i ddefnyddio 'deunydd pob dydd' degawd yn ddiweddarach! Mae'n gymaint o hwyl, yn hawdd i'w defnyddio ac heb unrhyw gyfyngiadau.
Darnau o waith wedi eu gwneud allan o dost a Marmite; Prif Weinidog y Deyrnas Unedig, Boris Johnson, a'r gohebydd Piers Morgan
Beth yw'r gwaith mwyaf heriol i ti wneud?
Maen nhw i gyd wedi cael elfennau anodd iddynt. Mae'r darnau yn yr awyr agored yn dibynnu ar....oes gen i gŵn fydd yn rhedeg ar draws y traeth a chicio'r tywod? Gwylanod yn dwyn tost? Mae'r ffactorau dwi'n gorfod ystyried yn eitha' doniol i fod yn onest.
Ond dwi'n meddwl mai'r anodda' oedd gwneud gwaith celf efo blawd! Blwyddyn diwetha' 'nes i fap enfawr o'r byd ar gyfer y gyfres ZeroZeroZero i NOW TV gan ddefnyddio blawd fel cocên. Roedd e mor anodd i'w reoli ond nes i gwblhau y gwaith yn y diwedd!
Hefyd, fe 'nes i weithio gyda bwyd cath ar gyfer un darn....roedd e'n drewi!
Mae dy waith wedi bod yn eitha' gwleidyddol ar brydiau, ond hefyd ti'n ymdrin â phynciau ysgafnach - beth sydd orau gen ti?
I fod yn onest dwi wrth fy modd yn gwneud nhw i gyd. Mae angen i mi gael hwyl tra dwi'n gweithio er mwyn cadw diddordeb.
Mae'r stwff gwleidyddol yn cyffwrdd â materion cyfoes ac yn adlewyrchiad o'r amseroedd ry'n ni'n byw ynddo. Mae'r stwff hwyl yn gwneud i bobl wenu ond mae yr un mor bwysig cofnodi adegau mewn hanes a diwylliant cyfoes.
Roedd ymddangos ar Britain's Got Talent yn agor dy gelf di, a chelf yn gyffredinol, i gynulleidfa na fyddai efallai'n ymddiddori mewn celf fel arfer - mae'n rhaid bod ti'n falch iawn o hyn?
100%! Dwi'n teimlo'n angerddol iawn am wneud yn siŵr bod celf o fewn cyrraedd i bawb. Er 'mod i'n gallu gwerthfawrogi galeri 'white wall art', mae'n gallu dychryn rhai bobl, felly dwi'n arddangos fy ngwaith mewn canolfannau siopa, ar y stryd, bwytai neu thafarndai! Unrhyw le!
Gwaith Nathan yn cael ei ddangos i'r Tywysog Charles
Mae'r cyfryngau cymdeithasol a rhaglenni teledu wedi bod yn wych i wneud i bobl gyffredin sylweddoli eu bod nhw hefyd yn gallu creu celf - efallai cafodd hyn ei bwysleisio fwy yn ystod y cyfnodau clo oherwydd Covid-19.
Dwi'n annog pobl i fynd drwy'r cypyrddau a chael gafael ar hen boteli sos coch, neu hanner lipstick, a jest CREU!
Beth yw'r darn o waith wyt ti mwyaf balch ohono?
Mae'n debyg y darn efo fingerprints o waed ffug nes i o Gareth Thomas. Roedd y darn am ei stori HIV ac fe wnaethon ni ddadorchuddio'r gwaith efo'n gilydd yng Nghlinig Iechyd Rhyw yng Nghaerdydd, ac roedd e'n emosiynol iawn.
Cyn-gapten Cymru, Gareth Thomas, gyda Nathan yn y Clinig Iechyd Rhyw yng Nghaerdydd
Mae celf yn gallu siarad i rywun mewn ffyrdd dydi geiriau yn aml methu gwneud - mae'n gallu bod mor bwerus. Mae'r darlun ar y wal yno fel arwydd pwerus o falchder i bobl weld wrth iddynt ymweld â'r clinig.
Pa mor bwysig yw hi i ti bod artistiaid yn creu gwaith sy'n adlewyrchu materion yn ein cymdeithas? Wyt ti'n teimlo dyletswydd i wneud hyn?
Yndw. Mae 'na bethau yn aml fyswn i'n hoffi rhoi mewn i eiriau a gweiddi amdano, ond dwi 'rioed di bod yn hyderus yn gwneud hynny. Mae fy nghelf i'n caniatau i fi WEIDDI'n weledol dros bynciau, ac mae'n gallu bod mor bwerus.
Rwyf wedi creu celf yn cefnogi materion LGBTQ fel ymwybyddiaeth am HIV, pobl trans, BLM a llawer mwy o gymunedau sydd ar yr ymylon a sydd angen cefnogaeth.
Mae hawliau'r gymuned LGBTQ yn rywbeth agos iawnat galon Nathan
Hefyd yn y Gwasanaeth Iechyd yn ystod y pandemig, mae gweithwyr ar y llinell flaen wedi wynebu camdriniaeth. Dwi wedi gwneud celf yn diolch iddyn nhw ac hefyd darn yn rhoi sylw i'r geiriau cas mae nhw wedi ei dderbyn arlein.
Gwaith a wnaeth Nathan yn diolch i'r Gwasanaeth Iechyd
Rwyt wedi creu gwaith ar gyfer sêr byd-eang, pa rai wnes di lwyddo i gwrdd ac beth oedd eu hymateb nhw?
Mae wastad yn wych pan dwi'n gallu cwrdd â'r bobl 'ma, gan mod i wir yn edmygu llawer ohonyn nhw. Roedd Mariah Carey yn anhygoel!
Cefais i fy nghomisiynu i wneud anrheg pen-blwydd iddi ac yna ges i'r cyfle i gwrdd â hi yn ei ystafell newid yn yr Albert Hall.
Gyda'r seren fyd-enwog, Mariah Carey
Rwyf wedi cyflwyno gwaith i'r Tywysog Charles ar gyfer achos da, a hefyd Catherine Zeta-Jones a Shirley Bassey pan gafon nhw'r anrhydedd Rhyddid i'r Ddinas yn Abertawe a Chaerdydd.
Yr un a oedd wedi ei chyffroi fwyaf wth ymateb i fy ngwaith oedd Joanna Lumley. Roedd hi wrth ei bodd gyda'r gwaith celf wnes i iddi allan o glitter aur ohoni fel ei chymeriad eiconig yn Absolutely Fabulous.
Seren y gyfres deledu boblogaidd o'r 90au, Absolutely Fabulous, Joanna Lumley
Pa brosiectau sy'n dy gyffroi ar gyfer y dyfodol? Beth sydd gan ti ar y gweill?
Lot fawr! Mae gen i restr enfawr. Dwi ar fin dechrau gweithio ar fy mhedwerydd llyfr, mae gen i ambell brosiect rhyngwladol ac mi fydda i yn ymddangos ar y teledu yn Awstralia. Mae gen i bethau mawr fydda i'n gweithio arno yn agosach i adref ac alla i ddim aros i ddatgan y manylion!
Dwi hefyd yn gweithio ar ddylunio crys-T ar gyfer Hanner Marathon Caerdydd, a fe fydd hynny'n anrhydedd enfawr.
Un arall o'i gyd-Gymry, Brenhines Tiger Bay, Shirley Bassey
Hefyd o ddiddordeb: