Covid: Coedlannau i gofio'r meirw yn Sir Gâr a Wrecsam

Bydd y coedlannau'n cynnig lle i deuluoedd gofio am eu hanwyliaid

Fe fydd coedlannau yn cael eu plannu yn Nyffryn Tywi a Wrecsam er mwyn cofio'r rheiny fu farw yn ystod pandemig Covid-19, cyhoeddodd y Prif Weinidog.

Mae safle trydedd goedlan goffa yn ne ddwyrain Cymru yn dal i gael ei benderfynu.

Bydd y coedlannau'n "gofeb fyw a pharhaol" i'r bobl fu farw, ac yn "symbol o gryfder pobl Cymru," meddai Mark Drakeford.

Y gobaith yw i bobl fedru mynd i'r coedlannau i gofio am eu hanwyliaid ac i adlewyrchu ar y pandemig, dywedodd Llywodraeth Cymru.

Fe wnaeth Mr Drakeford gyhoeddi ei fwriad i greu'r coedlannau ym Mawrth 2021, ac mae disgwyl i'r plannu ddechrau eleni.

'Gormod o bobl wedi eu cymryd'

Yn Wrecsam, fe fydd y goedlan yn cael ei chreu ar ran o stad Erddig - safle Ymddiriedolaeth Genedlaethol Cymru.

Bydd yr ail goedlan yn Sir Gaerfyrddin, ar safle yn Brownhill yn Nyffryn Tywi gafodd ei glustnodi gan Gyfoeth Naturiol Cymru.

Stad Erddig fydd safle un o'r coedlannau coffa

Wrth gyhoeddi'r lleoliadau, dywedodd Mr Drakeford: "Mae hi wedi bod yn bron i ddwy flynedd ers i bandemig coronafeirws daro Cymru.

"Mae gormod o bobl wedi cael eu cymryd cyn eu pryd gan yr haint erchyll yma.

"Fe fyddwn ni'n eu cofio nhw i gyd a'u cadw nhw yn ein calonnau a'n meddyliau."

Mae Llywodraeth Cymru yn disgwyl i'r coedlannau ffurfio rhan o Goedwig Genedlaethol Cymru yn y dyfodol.

Bydd rhywogaethau amrywiol o goed yn cael eu plannu er mwyn sicrhau gwytnwch y coedlannau yn sgil newid hinsawdd.

'Lle arbennig'

Fe fydd Cyfoeth Naturiol Cymru ac Ymddiriedolaeth Genedlaethol Cymru yn gweithio gyda chymunedau lleol a theuluoedd wrth gynllunio'r coedlannau.

Dywedodd Prif Weithredwr Cyfoeth Naturiol Cymru Clare Pillman: "Ein huchelgais ni ar gyfer y goedlan coffa yw iddi ddod yn ardal fyw i'r holl gymuned ei mwynhau, yn ogystal â man tawel i feddwl wrth i ni barhau i wynebu'r cyfnod heriol hwn."

"Fel rhan o'r daith, rydyn ni eisiau cyfathrebu gyda chymunedau lleol a'n partneriaid i gynllunio a dylunio'r goedlan, a chreu mannau diogel a hygyrch gyda nhw, ble gall pobl o bob oed ddod i gofio ac adlewyrchu am flynyddoedd i ddod."

"Mae natur wedi bod yn gysur mawr i nifer yn ystod y pandemig," medd Justin Albert

Yn ôl Cyfarwyddwr Ymddiriedolaeth Genedlaethol Cymru Justin Albert: "Mae natur wedi bod yn gysur mawr i nifer yn ystod y pandemig, gan ddod â phleser a sicrwydd wrth i bob agwedd arall o'n bywydau ni newid.

"Rydyn ni'n edrych ymlaen at gydweithio gyda chymunedau a phartneriaid er mwyn creu lle arbennig er cof am y bobl fu farw."

Dywedodd Llywodraeth Cymru ei bod am asesu effaith amgylcheddol plannu'r coedlannau, ymgynghori gyda chymunedau lleol, a sicrhau bod unrhyw effeithiau ar ardaloedd cyfagos yn cael eu hystyried.