Angen 'newid diwylliant' y gweithle i annog menywod
- Cyhoeddwyd
![Louise a'i phlant](https://ichef.bbci.co.uk/ace/standard/976/cpsprodpb/942A/production/_116703973_louise_and_her_girls-1.jpg)
Mae Louise O'Shea yn aml yn dod â'i merched i'r gwaith ac yn credu bod angen normaleiddio bywyd teuluol yn y gwaith
Mae'n rhaid cyflwyno newidiadau mewn mannau gwaith i gefnogi menywod i fod yn rheolwyr, yn ôl prif weithredwr cwmni yswiriant Confused.com.
Dywedodd Louise O'Shea ei bod hi'n lwcus ei bod yn gweithio i gwmni sy'n meithrin a chefnogi menywod ond dywedodd bod hynny'n "anarferol".
Daw ei sylwadau wrth i adroddiad newydd ddangos fod cyfran y menywod sy'n rheolwyr a chyfarwyddwyr wedi aros ar ei hunfan ar 39%.
Mewn ymateb, dywedodd llefarydd ar ran Llywodraeth Cymru bod cynllun ar waith i wella cydraddoldeb rhywedd yng Nghymru.
Roedd Louise O'Shea yn feichiog ers wyth mis pan ymgeisiodd am swydd Prif Weithredwr Confused.com
Ymgeisiodd Ms O'Shea o Gaerdydd am swydd Prif Weithredwr Confused.com pan oedd hi wyth mis yn feichiog. Cafodd gefnogaeth grŵp o gydweithwyr benywaidd.
Esboniodd fod llawer yn "teimlo'n ofnus" wrth gerdded i ystafell llawn rheolwyr gwrywaidd ac er ei bod wedi ymdrechu i newid y diwylliant hwnnw yn ei sefydliad, dydy hi ddim yn sefyllfa gyffredin.
Dywedodd ei bod yn dal i brofi rhwystrau a'i bod wedi'i cham-drin yn eiriol wyneb yn wyneb ac ar-lein - rhywbeth "na fyddai wedi digwydd i ddyn".
Serch hynny, mae'n cydnabod y gallai polisïau fel absenoldeb galar ar gyfer colli plentyn, polisïau mamolaeth a thadolaeth addas a normaleiddio bywyd teuluol yn y swyddfa helpu "newid y diwylliant".
Ychwanegodd y gallai gwell amodau ar gyfer cyfnod tadolaeth olygu fod 'na fwy o gefnogaeth i'w partneriaid.
Yn ôl Cerys Furlong o elusen Chwarae Teg mae newidiadau'n "digwydd yn rhy araf"
Yn ystod y cyfnod clo cyntaf, bu'n rhaid i 72% o famau sy'n gweithio orfod gweithio llai o oriau ac ennill llai oherwydd diffyg darpariaeth gofal plant, yn ôl ymchwil dros y DU.
Mae Cerys Furlong, Prif Weithredwr Chwarae Teg, yn cydnabod bod llawer o gynnydd wedi'i wneud tuag at wneud Cymru'n wlad gyfartal o ran rhywedd ers sefydlu Chwarae Teg 30 mlynedd yn ôl, ond mae'n pwysleisio bod y newid yn llawer rhy araf.
"Er bod angen gweithredu mewn nifer o feysydd rydym yn gwybod bod dau fater yn dal i fod yn gwbl hanfodol os ydym am sicrhau Cymru gyfartal o ran rhywedd - gofal plant a gwaith di-dâl, ac aflonyddu rhywiol, cam-drin a thrais," meddai.
Ychwanegodd: "Mae'r orddibyniaeth barhaus ar fenywod i ddarparu gofal a gwaith di-dâl mewn cymdeithas yn atal menywod rhag cymryd rhan yn yr economi ffurfiol â thâl."
Ategodd bod diffyg gofal plant fforddiadwy yn gwaethygu'r mater ymhellach.
'Ffocws benodol ar bynciau STEM'
Mewn ymateb, dywedodd llefarydd ar ran Llywodraeth Cymru bod cynllun ar waith i wella cydraddoldeb rhywedd, dolen allanol yng Nghymru.
Dywedodd: "Mae'r cynllun yn amlinellu ystod o weithrediadau i gyflawni'r uchelgais gan gynnwys ymrwymiadau yn ymwneud ag addysg, cyflogadwyedd a gwella cynrychiolaeth o fewn rolau arwain."
Ychwanegodd y llefarydd bod gan y llywodraeth "ffocws benodol ar wella cydraddoldeb rhywedd mewn pynciau STEM".
"Mae rhagdybiaethau o bynciau STEM yn gallu dechrau mewn oedrannau cynnar, felly mae'n allweddol ein bod yn cyflwyno pob dysgwr i wyddoniaeth a thechnoleg o gychwyn cyntaf eu siwrnai o ddysgu".
Beth arall gafodd ei ddarganfod yn yr adroddiad?
Mae adroddiad elusen Chwarae Teg yn dangos:
Mae mwy o fenywod 16-24 oed yn y DU bellach mewn gwaith o'i gymharu â dynion.
Ond mae 'na gynnydd cyffredinol mewn diweithdra ymhlith menywod, gyda menywod o leiafrif ethnig yn cael eu heffeithio'n benodol (6.7% yn ddi-waith nawr o'i gymharu â 2.4% y flwyddyn flaenorol)
Mae bwlch cyflog rhwng y rhywiau wedi cynyddu i 12.3% eleni.
Dim ond 29% o gynghorwyr Cymru sy'n fenywod.
Dim ond 28% o fenywod yng Nghymru sy'n teimlo'n saff yn cerdded ar ben eu hunain yn y tywyllwch.
Mae 73% o holl ddioddefwyr cam-drin domestig yng Nghymru a Lloegr yn fenywod gyda 53% o'r holl droseddau trais yn erbyn menywod yn gysylltiedig â cham-drin domestig.
Yn ôl arolwg ar ymddygiad busnesau bach yng Nghymru yn 2019, 13.5% o fusnesau bach a chanolig oedd yn cael eu harwain gan fenywod.
Ond, er y pryderon, nid pawb sydd yn yr un sefyllfa.
'Ni'n fwy hapus fel teulu'
Yn ystod y pandemig mae Gemma Pugh o Abertawe wedi ailasesu ei gyrfa a sefydlu busnes newydd.
Yn dilyn 15 mlynedd fel athrawes wyddoniaeth mae hi bellach yn rhedeg cwmni ffitrwydd.
Fe newidiodd Gemma Pugh o Abertawe ei gyrfa yn ystod y pandemig trwy adael ei swydd fel athrawes
"Erbyn hyn mae dros 100 o fenywod wedi ymuno â Fiercely Fit." meddai.
"Mae'r yrfa newydd yma yn siwtio fi achos gallai'n amlwg weithio rownd y plant a rownd fy mywyd personol i a 'neud yn siŵr wedyn mod i'n blaenoriaethu'r plant."
Ychwanegodd bod nifer o'i ffrindiau wedi dweud wrthi y bydden nhw wedi hoffi bod yn ddigon dewr i fentro.
"Mae 'na lot fawr - yn enwedig mamau - yn stryglan i allu ymdopi a trio neud."
Pynciau cysylltiedig
Straeon perthnasol
- Cyhoeddwyd18 Gorffennaf 2020
- Cyhoeddwyd5 Rhagfyr 2017
- Cyhoeddwyd16 Chwefror 2017