Teyrnged i dad, 35, fu farw wedi gwrthdrawiad ger Tonyrefail

Mae teulu dyn 35 oed fu farw yn dilyn gwrthdrawiad gyda cherbyd yn oriau mân bore Sul wedi'i ddisgrifio fel "tad, mab, brawd, wncwl ac ŵyr ffyddlon".

Cafodd y gwasanaethau brys eu galw i ffordd yr A4119 rhwng cylchfan Coed-Elái a chylchfan Tonyrefail yn Rhondda Cynon Taf tua 03:00 fore dydd Sul 13 Chwefror.

Dywedodd yr heddlu bod Christopher Williams o ardal Pentre wedi marw yn y fan a'r lle.

Mae dyn arall 35 oed o ardal Caerdydd wedi ei arestio mewn cysylltiad â'r digwyddiad. Mae wedi ei ryddhau wrth i swyddogion barhau â'u hymchwiliadau.

• Dyn, 35, wedi marw tra'n cerdded ger Tonyrefail

Wrth roi teyrnged iddo, dywedodd teulu Christopher Williams "na fyddai byth yn cael ei anghofio" ac y bydd "yn eu calonnau am byth".

"Roedd e'n byw ei fywyd i'w dair merch ifanc, Phoebe, saith, ac Emillie ac Esme, y ddwy yn bedair, sef y peth pwysicaf yn ei fywyd.

"Roedd Chris yn angerddol am gerddoriaeth ac roedd e wedi chwarae mewn sawl band yn y gorffennol, roedd e'n mwynhau karaoke ac roedd e'n dysgu ei ferch, Phoebe, i chwarae'r gitâr.

"Does dim geiriau i ddisgrifio'r golled y mae ein teulu'n delio gyda ac yn ei deimlo ar hyn o bryd. Mae wedi ei gymryd wrthom lawer yn rhy gynnar."

Mae'r heddlu'n apelio am ragor o wybodaeth ac yn awyddus i glywed gan unrhyw un oedd ger yr A4119 rhwng 02:00 a 03:00 fore Sul 13 Chwefror neu a welodd dacsi VW Jetta du yn yr ardal.