Dedfrydu pedwar wedi cwymp eglwys laddodd sgaffaldiwr

Bu farw'r sgaffaldiwr Jeff Plevey pan ildiodd wal gefn eglwys wrth iddo weithio arni

Mae pedwar dyn wedi cael dedfrydau gohiriedig am droseddau iechyd a diogelwch ar ôl i sgaffaldiwr farw pan gwympodd wal eglwys yng Nghaerdydd.

Cafodd Jeff Plevey, 56 oed o'r brifddinas, ei wasgu i farwolaeth yn ystod gwaith dymchwel Eglwys Citadel yn Sblot yng Ngorffennaf 2017.

Dywedodd barnwr yr Uchel Lys yn Llys y Goron Caerdydd fod pob un o'r diffynyddion yn "gyfrifol i ryw raddau am farwolaeth drist a diangen" Mr Plevey.

Cafodd pedwar cwmni hefyd ddirwyon o dros £340,000.

Bu farw Mr Plevey pan ildiodd wal gefn yr eglwys wrth iddo weithio arni.

Fe gafodd Mr Plevey ei wasgu i farwolaeth yn ystod gwaith dymchwel Eglwys Citadel yn Sblot

Cafodd Keith Young, 74 o Landochau ym Mro Morgannwg, ddedfryd o 45 wythnos o garchar wedi'i gohirio am 18 mis, tra bod Stewart Swain, 54 o Gaerdydd, wedi cael dedfryd o 39 wythnos wedi'i gohirio am 15 mis.

Young oedd yr adeiladwr oedd yn rheoli'r gwaith o ddymchwel yr adeilad, tra mai Swain ydy cyfarwyddwr cwmni Swain Scaffolding.

Mewn achos llys ym mis Rhagfyr fe gafwyd y ddau yn ddieuog o ddynladdiad trwy esgeulustod dybryd, ond yn euog o droseddau iechyd a diogelwch.

Cafodd trydydd dyn, Philip Thomas, 57 o Gaerdydd - ymgynghorydd iechyd a diogelwch Young o South Wales Safety Consultancy - ddedfryd o 35 wythnos wedi'i gohirio am 15 mis.

Fe gafodd y dyn olaf, Richard Dean, 60 o Abertyleri - cyfarwyddwr NJP Consultant Engineers - ddedfryd o 35 wythnos o garchar, wedi'i gohirio am 15 mis.

Dirwyon i gwmnïau

Fe gafodd tri o'u cwmnïau hefyd eu dirwyo am fethiannau iechyd a diogelwch - dirwy o £120,000 i Swain Scaffolding, £97,500 i South Wales Safety Consultancy a £93,300 i NJP Consultant Engineers.

Cafodd cwmni arall - Strongs Partnership - hefyd ddirwy o £33,500 am fethiannau iechyd a diogelwch.

Dywedodd y barnwr, Ustus Jefford, pe bai unrhyw un o'r dynion neu eu cwmnïau wedi sylweddoli fod pethau'n mynd o chwith, y "byddai wedi bod modd osgoi marwolaeth Mr Plevey".