'Dechrau cyfnod newydd' i hanner marathon Caerdydd

Fe wnaeth dros 25,000 o bobl gofrestru ar gyfer yr hanner marathon

Wedi bwlch o 903 o ddyddiau, fe ddychwelodd Hanner Marathon Caerdydd i'r brifddinas ddydd Sul.

Fe wnaeth dros 25,000 o bobl o Gymru a thu hwnt gofrestru i redeg y ras 13.1 milltir o hyd gafodd ei gohirio ddwywaith yn sgil cyfyngiadau Covid-19.

Wrth i'r haul dywynnu ar y rhedwyr a'u cefnogwyr, dyma oedd y digwyddiad torfol mwyaf o'r fath yng Nghymru ers cyn y pandemig.

Dywedodd y cyn athletwr Olympaidd a chyfarwyddwr y ras Steve Brace bod ras ddydd Sul "yn ddechrau cyfnod newydd".

Ras 'arbennig'

Natasha Cockram o Gwmbran oedd enillydd ras y merched

Cymraes ddaeth i'r brig yn ras y merched am y tro cyntaf ers 2004, wrth i Natasha Cockram gwblhau'r marathon gydag amser o 1:10:47.

Llwyddodd i osod record newydd i'w hun, oedd tua dwy funud yn llai na'i hamser gorau blaenorol, wrth iddi anelu at gystadlu yng Ngemau'r Gymanwlad.

Cyn y ras, dywedodd Cockram ei bod hi'n edrych ymlaen at fod yn rhan o'r digwyddiad wrth iddo ddychwelyd wedi'r pandemig.

Cockram, 29, (trydydd o'r dde) sy'n dal record marathon Cymru

"Dwi'n meddwl y bydd e hyd yn oed yn fwy arbennig," meddai.

Yn dilyn ei buddugoliaeth, roedd Cockram yn edrych tua'i nod nesaf.

"Dwi wedi breuddwydio am Gemau'r Gymanwlad ers i mi fod yn ifanc iawn, felly gobeithio nawr ga' i fy newis ar gyfer hwnna."

Bronwen Owen ddaeth yn ail (1:14:04) ac Elle Twentyman wnaeth orffen yn drydydd (1:14:58).

Llwyddodd Kadar Omar i guro'i amser orau fore Sul

Kadar Omar oedd yn fuddugol yn ras y dynion, a hynny mewn 1:02:46 - gan osod record newydd i'w hun hefyd.

Y brodyr Mahamed Mahamed (1:02:52) a Zakariya Mahamed (1:04:05) o Southampton ddaeth yn ail ac yn drydydd.

Roedd y tri ar y blaen drwy gydol y ras, ond erbyn y filltir olaf Omar oedd yn arwain.

• Ras emosiynol ar Sul y Mamau i ffoadur o Wcráin

• Gohirio hanner marathon yn 'anodd' i elusennau

"Fy nod oedd i brofi fy hun gyda'r athletwyr gorau ac ennill, felly dwi'n hapus gyda'r fuddugoliaeth," meddai.

Fe wnaeth Omar ffoi o Ethiopia yn 13 oed, ac mae nawr yn byw yn Birmingham.

"Des i o hyd i gartref trwy chwaraeon, ac fe wnaeth chwaraeon newid fy mywyd."

Sam Kolek ddaeth i'r brif yn ras cadair olwyn y dynion

Cyn-enillwyr oedd yn fuddugol yn y rasys cadair olwyn, gyda'r nifer uchaf erioed yn cystadlu.

Sam Kolek wnaeth guro ras gadair olwyn y dynion gydag amser o 56:08, a Mel Nicholls (1:06:36) enillodd ras gadair olwyn y merched.

'Ras fwyaf emosiynol fy mywyd'

Inna Gordiienko a'i gŵr ar y linell derfyn

Roedd hi'n ras arwyddocaol i nifer, gan gynnwys Inna Gordiienko o Wcráin.

Fe wnaeth Inna ffoi o'i mamwlad gan amau bod rhyfel ar y gorwel, a gyda'r hanner marathon yn digwydd ar Sul y Mamau, dywedodd y byddai hi'n meddwl am ei mam a'i nain, sy'n dal yn Wcráin, bob cam o'r ffordd".

"Dwi'n meddwl mai dyna oedd y ras fwyaf emosiynol dwi wedi ei rhedeg yn fy mywyd," meddai ar ôl gorffen. "Doeddwn i ddim yn gallu rhedeg achos ro'n i'n crio."

Bwrlwm y linell derfyn, ger Prifysgol Caerdydd

"Pob tap ar yr ysgwydd, pob bawd i fyny, pob 'Go Wcráin!', roedd e'n teimlo fel petai'r holl fyd y tu ôl i mi."

Roedd yna funud o gymeradwyaeth ar ddechrau'r ras i ddangos cefnogaeth i'r rhai sy'n cael eu heffeithio gan y rhyfel yn Wcráin.

Bydd yr hanner marathon yn cael ei chynnal am y tro nesaf ym mis Hydref 2022.