Anhrefn Mayhill: Wyth dyn yn pledio'n euog

Cafodd tân ei gynnau mewn car a chafodd ffenestri eu torri ar 20 Mai

Mae wyth dyn wedi pledio'n euog i fod yn rhan o anhrefn Mayhill yn Abertawe y llynedd.

Fe wnaeth y dynion, sydd rhwng 20 a 44 oed, gyfaddef i fod yn rhan o'r terfysg ar Heol Waun-Wen ar 20 Mai 2021.

Cafodd ceir eu llosgi a chwalwyd ffenestri ar ôl i ŵylnos i ddyn ifanc fu farw droi'n dreisgar.

Mae cyfanswm o 27 o bobl yn wynebu cyhuddiadau o droseddau mewn cysylltiad â'r anhrefn.

Roedd Ffordd Waun-wen yn edrych fel "maes y gad" medd rhai trigolion

Yn Llys y Goron Abertawe, fe wnaeth y dynion canlynol bledio'n euog i fod yn rhan o reiat:

• William Smolden, 24

• Michael Parsons, 37

• Jahanzaib Malik, 21

• Dean Price, 40

• Tyrone Langan, 27

• Ryan Sarsfield, 25

• Paul Jones, 44

• Ryan Owen, 20

Nid ydy'r dynion wedi eu dedfrydu eto.

Fe wnaeth dau ddyn arall wadu cymryd rhan yn yr anrhefn - plediodd Kian Hurley, 23, a Kye Dennis, 24 yn ddieuog.

Mae disgwyl i 12 o bobl eraill ymddangos gerbron Llys y Goron Abertawe yr wythnos hon.