Anhrefn Mayhill: 27 yn wynebu cyhuddiadau

Cafodd tân ei gynnau mewn car a chafodd ffenestri eu torri ar 20 Mai

Mae Heddlu De Cymru wedi cadarnhau bod 27 o bobl yn wynebu cyhuddiadau o droseddau mewn cysylltiad ag anhrefn Mayhill, Abertawe ym mis Mai y llynedd.

Daw hyn ar ôl i'r heddlu ymddiheuro i drigolion ym mis Ionawr ymddiheuro i drigolion ym mis Ionawr am fethu "gweithredu'n ddigon cyflym" yn ystod y terfysg ar Heol Waun-Wen ar 20 Mai 2021.

Cafodd ceir eu llosgi a chwalwyd ffenestri yn ardal Mayhill ar ôl i ŵylnos i ddyn ifanc fu farw droi'n dreisgar.

Cafodd cyfanswm o 46 o bobl eu harestio yn dilyn yr anhrefn.

• 'Sioc a siom' am ddiffyg erlyn wedi anhrefn Mayhill

• Heddlu'n ymddiheuro am ymateb i anhrefn Mayhill

Ddydd Mercher, fe ddywedodd yr heddlu bod y 27 o bobl sy'n wynebu cyhuddiadau rhwng 15 a 44 oed.

Mae'r cyhuddiadau'n ymwneud â throseddau terfysg [riot] ac mae dau ddiffynnydd yn wynebu cyhuddiadau o losgi bwriadol gyda'r bwriad o beryglu bywyd neu fod yn ddi-hid ynghylch a fyddai bywyd rhywun arall yn cael ei beryglu.

Roedd Ffordd Waun-wen yn edrych fel "maes y gad" medd rhai trigolion

Dywedodd y Prif Uwcharolygydd Trudi Meyrick, rheolwr plismona Abertawe a Chastell-nedd Port Talbot: "Yn dilyn ymchwiliad trylwyr gan dditectifs lleol, mae Gwasanaeth Erlyn y Goron [CPS] wedi derbyn tystiolaeth yn erbyn yr unigolion hyn.

"Yn dilyn ystyriaeth fanwl gan y CPS, maent wedi caniatáu cyhuddiadau o derfysg a llosgi bwriadol gyda bwriad i beryglu bywyd."

Ychwanegodd y Prif Uwcharolygydd bod y tîm ymchwilio wedi ymrwymo i ymchwilio'r anhrefn yn drylwyr a bydd y broses yn parhau dan y system gyfiawnder.

Mae disgwyl i'r 27 sydd wedi eu cyhuddo ymddangos yn Llys Ynadon Abertawe rhwng 2 a 4 Mawrth 2022.