Gwrthdrawiad M4: Tŷ 'fel cragen wag' ers marwolaeth brawd a chwaer

Bu farw'r brawd a chwaer, Gracie-Ann a Jayden-Lee, yn dilyn gwrthdrawiad ar yr M4 fis Chwefror

Mae teulu a gollodd dau o blant mewn gwrthdrawiad ar yr M4 yn dweud bod eu cartref "yn teimlo fel cragen wag" hebddyn nhw.

Bu farw Gracie-Ann Lucas, 4, a'i brawd bach, Jayden-Lee Lucas, 3, ar ôl i fan daro'r car yr oedden nhw'n teithio ynddo ar 5 Chwefror.

Mae dyn wedi cael dedfryd o naw mlynedd a phedwar mis yn y carchar am ladd y ddau blentyn. Roedd cocên yn ei gorff ar y pryd a botel o win coch ar agor yn y fan.

Fe blediodd Martin Newman, 41, o Gastell-nedd Port Talbot yn euog i gyhuddiad o achosi marwolaeth y ddau blentyn ac anafu eu mam, Rhiannon Lucas, yn ddifrifol yn y gwrthdrawiad ar yr M4 ger Casnewydd.

Mae Martin Newman wedi cael dedfryd o naw mlynedd a phedwar mis yn y carchar am achosi marwolaethau'r ddau blentyn

Roedd gan Newman ddwywaith y lefel cyfreithiol o alcohol yn ei gorff, ac roedd cocên yn ei system pan darodd y car Fiesta, oedd wedi tynnu i mewn i'r llain galed yng Nghasnewydd.

Clywodd y llys bod Newman wedi cymryd cocên ac wedi yfed fodca a 10 can o seidr tan 05:00 fore'r gwrthdrawiad.

'Bywydau wedi eu dinistrio'

Mewn datganiad, fe ddywedodd teulu'r ddau blentyn na fyddai unrhyw beth yn gallu cymryd lle y "cariad ac hapusrwydd" yr oedd y ddau yn ei roi iddyn nhw.

Cafodd Rhiannon Lucas, mam y ddau blentyn, ei hanafu yn y gwrthdrawiad hefyd

"Mae ein cartref teuluol nawr yn teimlo fel cragen wag hebddyn nhw..." dywedodd y teulu.

"Mae ein bywydau wedi eu dinistrio.

"Fe ddewisodd e [Martin Newman] yrru ei gerbyd dan ddylanwad diod a chyffuriau ac mae'r gweithredoedd hyn wedi dangos diystyriaeth lwyr o ddiogelwch unrhyw un."

Ychwanegodd y teulu eu bod wedi "talu'r pris eithaf am ei weithredoedd".

Gan ddiolch i'r gwasanaethau brys a chymuned Tredegar, dywedon nhw nad oes "diwrnod wedi mynd heibio lle nad ydyn ni wedi cael cynnig cariad a chefnogaeth" a bod hynny'n "meddwl y byd".

Bu farw Gracie-Ann ar ddiwrnod y gwrthdrawiad, a phum niwrnod yn ddiweddarach, bu farw Jayden-Lee

Roedd y teulu o Dredegar, Blaenau Gwent, yn dychwelyd o barti penblwydd ar 5 Chwefror pan ddigwyddodd y gwrthdrawiad.

Cafodd Jayden-Lee a Gracie-Ann eu cludo i Ysbyty Athrofaol Cymru yng Nghaerdydd i drin eu hanafiadau, ond bu farw'r ddau yn ddiweddarach.

Fe welodd Llys y Goron Caerdydd dystiolaeth o gamerâu Traffig Cymru. Roedd yn dangos fan Newman yn gwyro ar hyd lonydd yr M4 o Bont Tywysog Cymru i'r pwynt lle darodd car y teulu.

Digwyddodd y gwrthdrawiad rhwng Casnewydd a Chaerdydd.

Cameraau Traffic Cymru yn dangos traffig trwm yn dilyn y gwrthdrawiad rhwng Casnewydd a Chaerdydd

Dywedodd yr erlynydd, Roger Griffiths, bod Newman yn "crwydro ar hyd lonydd".

Clywodd y llys bod Newman yn credu iddo syrthio i gysgu "am eiliad" cyn y gwrthdrawiad.

Daeth yr heddlu o hyd i botel o win coch ar agor yn ei fan yn dilyn y gwrthdrawiad. Dywedodd Newman wrth swyddogion ei fod wedi cael "llymaid ohono".

Fe glywodd y llys bod Newman wedi ei gael yn euog o yfed a gyrru yn y gorffennol.

Ychwanegodd yr erlynydd bod "grym y gwrthdrawiad wedi gorfodi'r seddi cefn i gefn y seddi blaen y tu mewn i'r car".

Dywedodd y barnwr mai dyma'r "lefel fwyaf difrifol o yrru'n beryglus" a'r "anwybyddiad mwyaf amlwg o reolau'r ffordd".