Cymorth i bobl Wcráin drwy werthiant ci defaid

Bydd ci defaid bach yn cael ei werthu mewn ocsiwn ddydd Mercher, a'r elw i gyd yn mynd i deuluoedd yn Wcráin.

Bydd yr ast 11 wythnos oed yn cael ei gwerthu mewn arwerthiant ar-lein gan gwmni Marchnad Ffermwyr Dolgellau, gyda'r holl elw yn mynd i apêl DEC ar gyfer Wcráin.

Mae'r arwerthwyr yn disgwyl y bydd y ci bach yn gwerthu am bris da o ystyried bod ei mam, Kim, yn dal y record am y pris uchaf erioed a dalwyd am gi defaid mewn arwerthiant.

Cafodd Kim - ci defaid o Dal-y-bont yng Ngheredigion - ei gwerthu yn Chwefror 2021 am £27,100. Roedd wedi'i hyfforddi gan Dewi Jenkins o Dal-y-bont - a werthodd yr ast i ddyn o Sir Stafford.

Cefnogi pobl Wcráin

Mae ci bach Kim nawr yn cael ei werthu gan Eamonn Vaughan, ffermwr o Sir Stafford, gyda'r elw i gyd yn mynd i gynorthwyo teuluoedd sy'n dioddef yn sgil y rhyfel.

Dywedodd Mr Vaughan: "Mae'r digwyddiadau yn Wcráin yn ofnadwy. Fel busnes mae gennym ni gysylltiadau ag Wcráin ac roedden ni eisiau helpu, mae'n achos da.

Magwyd Kim Jnr ar fferm yn Sir Stafford

"Mae'n gi bach da a dwi'n meddwl y bydd hi'n gwneud arian da - yn fy marn i, hi yw'r ci o'r llinach gorau sydd wedi dod ar werth ers amser maith."

'Diddordeb mawr' mewn defaid

Boss yw enw tad y ci bach, ac yn ôl y disgrifiad gwerthu "does dim gwell achos i'w gael i werthu'r unig ast o linach Kim a Boss na Wcráin".

Mae'r hysbyseb yn dweud y bydd holl elw'r gwerthiant yn mynd yn syth i Wcráin, a bod "Marchnad y Ffermwyr Dolgellau wedi cytuno i weithio gyda ni ar ffioedd y gwerthiant".

"Mae brîd yr ast fywiog hon yn siarad dros ei hun. Mae gan y ci bach y geneteg i ragori mewn treialon neu fel ci gweithio."

Mae'n cael ei hadnabod ar hyn o bryd fel Kim Jnr ac mae'r disgrifiad yn dweud wrth iddi weld defaid am y tro cyntaf, iddi ddangos "diddordeb mawr".

Kim Jnr yn cymryd diddordeb mewn maharen

Dywedodd Rhys Davies, Prif Weithredwr Marchnad Ffermwyr Dolgellau: "Roedd cael gwerthu'r unig ast fach allan o'r torllwyth hwn gan Kim, deiliad record y byd, yn ein harwerthiant presennol yn fraint ynddo'i hun, ond mae'n wirioneddol anhygoel i'r gwerthwr gynnig rhoi'r holl elw i apêl Wcráin.

"Yn amlwg bu'n rhaid i ni ymateb fel y gallwn ni, ac felly ni fydd comisiwn i'r prynwr na'r gwerthwr ar y lot hon (Lot 137). Rydyn ni'n disgwyl gyda'i phedigri y bydd hi'n gwerthu'n dda iawn ac rydyn ni'n gobeithio y bydd hi'n mynd i gartref da."

Pan gafodd mam yr ast ei gwerthu dywedodd hyfforddwr Kim, Dewi Jenkins, ei bod yn dalentog iawn.

"Roedd yn gwneud popeth - gweithio'r gwartheg a'r defaid, ac yn barod i weithio i unrhyw un mewn treialon neu ar y fferm.

Dywedodd Dewi Jenkins fod gan Kim Jnr 'y geneteg i ragori'

"Popeth nes i hyfforddi hi i wneud roedd hi'n ei wybod erbyn yr eildro. Roedd hi'n dysgu'n gyflym."

Ar y pryd dywedodd Mr Jenkins ei fod yn drist iawn i werthu Kim ond yn "gobeithio prynu un o'i chŵn bach yn y dyfodol".