Ymddiheuriad cynghorydd Sir Gâr am regi mewn cyfarfod Zoom

Mae cynghorydd sir wedi ymddiheuro am regi yn ystod cyfarfod Zoom, gan ddweud ei fod yn meddwl nad oedd ei feicroffôn ymlaen.

Roedd modd i gyd-gynghorwyr glywed rhegfeydd y cynghorydd Plaid Cymru, Dorian Phillips yn ystod sesiwn hyfforddiant mewnol Cyngor Sir Gâr.

Dywed Mr Phillips nad oedd yn annerch y cyfarfod pan ddefnyddiodd "iaith liwgar".

Mae aelodau grŵp Llafur y cyngor wedi galw ar Blaid Cymru i wahardd Mr Phillips.

Yn ôl arweinydd y grŵp Llafur, Rob James, cafodd y sylwadau eu gwneud wrth i gynghorwyr gael eu hysbysu bod tua 95% o holl benderfyniadau'r cyngor yn cael eu cymryd gan y cabinet Plaid Cymru.

Dywedodd Mr Phillips, sydd wedi cynrychioli ward Llanboidy ers 2012: "Ni alla'i wadu fy mod wedi defnyddio iaith reglyd, ond doedd e ddim wedi ei anelu at unrhyw un yn y cyfarfod yna.

"Yn ystod y sesiwn, bu'n rhaid i mi ddelio gyda sgwrs fusnes na wnelo dim â'r cyngor a aeth yn danllyd, ac roedd yna ddefnydd o iaith liwgar.

"Roedd yn fraw i mi glywed bod fy meicroffôn ymIaen a bod yna argraff fy mod yn annerch y cyfarfod. Nid dyna yn sicr oedd yr achos."

Dywedodd Mr Phillips ei fod wedi cyfeirio ei hun at yr Ombwdsmon Gwasanaethau Cyhoeddus.

Ychwanegodd Rob James: "Roedd hwn yn ymddygiad wirioneddol ofnadwy gan gynghorydd etholedig ac mae wedi peri gofid i nifer o gynghorwyr oedd yn mynychu'r cyfarfod.

"Rydym yn galw ar [arweinydd Plaid Cymru] Adam Price i gondemnio'r ymddygiad yma a'i wahardd o'r blaid tra bod ymchwiliad yn cael ei gynnal."