Deddfau Cymreig ar gyfer 'dyfodol tecach a gwyrddach'

Bagiau plastigPA Media

Gallai bagiau plastig untro gael eu gwahardd o dan y ddeddfwriaeth

Bydd deddfau newydd arfaethedig i wahardd amrywiaeth o blastigau untro, gwella ansawdd aer a diwygio cymorth amaethyddol yn cael eu rhoi gerbron y Senedd dros y flwyddyn nesaf, yn ôl Prif Weinidog Cymru.

Bydd biliau hefyd ar ddiogelwch tomenni glo ac i symleiddio'r broses ar gyfer cytuno ar brosiectau seilwaith mawr.

Dywedodd Mark Drakeford fod gan y cynlluniau "uchelgeisiol... ffocws clir ar ddyfodol cryfach, tecach a gwyrddach Cymru".

Beirniadodd y Ceidwadwyr gynllun i ehangu'r Senedd.

'Rhuthro'

Dywedodd arweinydd y Torïaid yn Senedd Cymru, Andrew RT Davies, fod "rhuthro" cynigion i godi nifer gwleidyddion Bae Caerdydd o 60 i 96 "yn dangos mor allan o gysylltiad yw gweinidogion Llafur".

Wrth groesawu cynlluniau Llywodraeth Cymru ar y cyfan, dywedodd arweinydd Plaid Cymru Adam Price ei fod yn "edrych yn denau iawn o'i gymharu â'r rhaglenni deddfwriaethol a welwn yn yr Alban".

Cafodd y cynlluniau i ddiwygio'r Senedd, sydd hefyd yn newid y system bleidleisio ar gyfer etholiadau'r Senedd, eu datgelu gan Mr Drakeford a Mr Price ym mis Mai ac fe'u cefnogwyd gan gynhadledd arbennig Llafur Cymru y penwythnos diwethaf.

Yn ystod trydedd flwyddyn Llywodraeth Cymru a etholwyd ym mis Mai 2021, bydd bil i ailwampio'r diwydiant bysiau a allai yn y pen draw arwain at un rhwydwaith i fysiau ac un system docynnau ledled Cymru.

Bydd deddfwriaeth, meddai gweinidogion, i wella'r ffordd y codir y dreth gyngor i'w gwneud yn decach, hefyd yn cael ei chyflwyno'r flwyddyn honno.

Dywedodd Mark Drakeford mai'r nod yw gwella bywydau pawb yng Nghymru

Cyfreithiau newydd arfaethedig ar gyfer y flwyddyn i ddod

  • Bil ar Blastigau Untro a fydd yn gwahardd neu'n cyfyngu ar werthu eitemau sy'n cael eu taflu fel sbwriel yn aml, fel gwellt a chytleri plastig

  • Bil Aer Glân i gyflwyno targedau a rheoliadau "uchelgeisiol" i leihau allyriadau a gwella ansawdd aer

  • Bil Amaeth i ddiwygio cymorth i amaethyddiaeth Cymru, gan "ganolbwyntio ar gynhyrchu bwyd cynaliadwy a gwobrwyo ffermwyr sy'n cymryd camau i ddiogelu'r amgylchedd"

  • Bil ar Gydsynio Seilwaith i "symleiddio'r broses o gytuno ar brosiectau seilwaith mawr, gan roi mwy o sicrwydd i gymunedau a datblygwyr"

  • Bil ar Ddiogelwch Tomenni Glo i wella'r rheolaeth ar domenni glo nas defnyddir, "gan ddiogelu cymunedau sy'n byw yng nghysgod y tomenni hyn, wrth i'r risg o niwed sy'n gysylltiedig â'r tywydd gynyddu iddynt".

Ychwanegodd y prif weinidog: "Mae gennym agenda ddeddfwriaethol lawn o'n blaenau wrth inni osod y sylfeini tuag at y Gymru yr ydym am ei gweld.

"Er mwyn cyflawni hyn byddwn yn parhau i weithio ar draws y Siambr i sicrhau bod ein deddfwriaeth y gorau y gall fod a'i bod yn gwella bywydau pobl Cymru gyfan."

Pynciau cysylltiedig

Straeon perthnasol