Ehangu banc bwyd mewn mosg yn sgil argyfwng costau byw

Mae'r galw am fanciau bwyd wedi cynyddu eleni

Mae mosg sydd hefyd yn gweithredu fel banc bwyd wedi dyblu mewn maint wrth i fwy o bobl wynebu trafferthion yn sgil argyfwng costau byw.

Bellach fe all mosg a banc bwyd Al-Ikhlas yng Nghaerdydd storio mwy o roddion a dosbarthu dwbl y bwyd.

Dywedodd staff eu bod yn falch y gallant "helpu mwy o bobl" wrth i'r galw gynyddu.

Yn y cyfamser dywed gweinyddwyr banc bwyd ym Mhont-y-clun, Rhondda Cynon Taf, bod y nifer sy'n defnyddio'u gwasanaeth wedi cynyddu'n ddirfawr.

Mae Mosg Al-Ikhlas wedi datblygu i gwrdd â gofynion y gymuned

Mae'r ehangiad i adeilad Al-Ikhlas, yn ardal Adamsdown, Caerdydd yn golygu ei fod wedi tyfu o fod yn ganolfan dysgu Arabeg i fod yn fan gweddi a ddydd Gwener mae'r adeilad newydd tri llawr ar ei newydd wedd yn agor ei ddrysau.

Am y tro cyntaf hefyd bydd gan fenywod Mwslemaidd yr ardal ofod i'w hunain i weddïo a hynny am y tro cyntaf.

Mosg yn cwrdd â'r gofyn

Yn sgil ehangu'r adeilad mae'r mosg bellach yn gallu darparu 400 o becynnau bwyd yr wythnos i ateb y galw.

Dywedodd Mohammed Maybu Rahman: "Rwy'n hapus i allu cefnogi'r banc bwyd gan gyfrannu bwyd o fy mwyty yn y Barri [Bro Morgannwg]."

Mohammed Maybu Rahman yn hapus i allu cefnogi'r banc bwyd

Yn ôl prif Imam y Mosg, Imam Ali, mae'r angen am y banc bwyd wedi cynyddu a dywed ei fod yn gobeithio bod modd ateb y galw cynyddol.

Dywedodd Ali, myfyriwr peirianneg sydd hefyd yn aelod o staff arlwyo Al-Ikhlas: "Mae mwy o le gyda ni i weddïo, ond yn bwysicach, i'r gymuned ehangach, gan ein bod yn rhedeg banc bwyd 'ma, mae'n golygu ein bod yn gallu storio mwy o fwyd a helpu mwy o bobl."

Mwy o alw am fanciau bwyd

Mae'r Trussell Trust yn dweud yn ystod y flwyddyn hyd at Fawrth 2022 bod 131,232 o becynnau bwyd argyfwng wedi'u dosbarthu gan gynnwys 48,500 o becynnau i blant.

Dywedodd banc bwyd Taf Elái ym Mhont-y-clun fod y galw wedi dyblu yn ystod y flwyddyn ddiwethaf - o 82 taleb ym Mehefin 2021 i 166 fis diwethaf.

Andrew Butcher o Fanc bwyd Taf Elái yn gofidio am sefyllfa rhai teuluoedd

Mae'r niferoedd yn gallu "mynd y tu hwnt i reolaeth" medd rheolwr prosiect yr elusen, Andrew Butcher.

Ychwanegodd "gyda phrisiau bwyd yn uchel a chostau tanwydd yn cynyddu, mae pobl yn gorfod gwneud y penderfyniad anodd rhwng rhoi bwyd ar y bwrdd, neu dalu'r biliau".

Dywedodd Mr Butcher bod rhai o ddefnyddwyr y banc bwyd yn gorfod dewis rhwng cael y we, fel bod eu plant yn gallu gwneud gwaith cartref, neu gael bwyd ar y bwrdd.

Ychwanegodd ei fod yn rhagweld y bydd y chwe wythnos o wyliau haf yn yr ysgolion yn mynd i fod yn anodd i deuluoedd.